ပုံမှန်အနေဖြင့် လူသားတိုင်းသည် မျက်နှာအသားအရေ၊ ဆံကေသာနှင့် လက်များကို ဂရုစိုက်ရန်အတွက် အထူးကြိုးစားအားထုတ်နေကြပါတယ်။ မျက်နှာအသားအရေအား အစိုဓာတ်ထိန်းခရင်မ်များကို အကြိမ်ပေါင်းမြောက်မြားစွာ လိမ်းခြယ်နေကြသော်လည်း ခြေထောက်များကိုတော့ ဂရုစိုက်ရန်သာမက အကြောဆန့်ဖို့ကိုတောင် မေ့လျော့သွားတတ်ကြပါတယ်။

ခြေထောက်ကိုဂရုမစိုက်သည့်အခါမှာ ဘတ်တီးရီးယားများဝင်ရောက်ခြင်း၊ ခြေထောက်အသားမာများဖြစ်ပေါ်ခြင်း၊ ခြေထောက်ကွဲခြင်း၊ ခြေနံ့ထွက်ခြင်း စသည့်ဆိုးကျိုးများ ပေါ်ပေါက်လာနိုင်ပါတယ်။ ထို့ကြောင့် အခြားအသားအရေများကို ဂရုစိုက်ရုံသာမက နေ့စဉ်သွားလာလှုပ်ရှားနေရာမှာ အဓိကအသုံးပြုနေရတဲ့ ခြေထောက်တို့ကိုပါ အာရုံထားပြီးထိန်းသိမ်းစောင့်ရှောက်နိုင်စေရန် ရည်ရွယ်၍ နည်းလမ်းအချို့ကိုဖော်ပြပေးလိုက်ရပါတယ်။

၁။ ခြေထောက်ဆေးကြောသန့်စင်ခြင်း

ခြေချောင်းများကြားရှိ အသားအရေသည် ဘတ်တီးရီးယားများ၊ ရောဂါပိုးများ ဝင်ရောက်ရန်အတွက် အကောင်းဆုံးနေရာဖြစ်သောကြောင့် သေသေချာချာဆေးကြောသန့်စင်ပေးရန် လိုအပ်ပါတယ်။ စုထေးနေသောအညစ်အကြေးများ၊ ချွေးများကို ဖယ်ရှားပစ်နိုင်ရန်အတွက် တစ်နေ့လျှင် တစ်ကြိမ် ခြေထောက်ကိုစိမ်ပြီးသေချာဆေးကြောပေးပါ။

၂။ ခြောက်အောင်ထားခြင်း

စိုထိုင်းမှုရှိသည့် ခြေထောက်အစိတ်အပိုင်းများသည် မှိုရောဂါကူးစက်မှုဖြစ်ပေါ်ရန် အလားအလာအရှိဆုံးနေရာတစ်ခုဖြစ်သည့်အတွက် ခြေထောက်ဆေးပြီးသည့်အခါ ခြေချောင်းကြားလေးများကိုပါ သေသေချာချာသုတ်ပေးဖို့ လိုအပ်ပါတယ်။

၃။ အလှဆီလိမ်းပေးခြင်း

အစိုဓာတ်နည်းပါးသည့်အခါမှာ ခြေထောက်အသားအရေခြောက်သွေ့ခြင်း၊ အရေခွံထူလာခြင်း၊ အသားအက်ကွဲလာခြင်း စသည့်နောက်ဆက်တွဲများကို ဖြစ်ပေါ်လာစေနိုင်သောကြောင့် မျက်နှာနှင့်လက်ကိုသာမက ခြေထောက်ကိုပါ နေ့စဉ်အချိန်မှန်မှန် အလှဆီလိမ်းပေးဖို့ မှတ်သားထားစေလိုပါတယ်။

၄။ ညီညာမှုမရှိသည့်အရေခွံများကိုဖယ်ရှားပစ်ခြင်း

လစဉ်ပေါင်းတင်ပေးရုံဖြင့် ခြောက်သွေ့ကြမ်းတမ်းသည့်အသားအရေများကို ဖယ်ရှားပစ်နိုင်ရုံသာမက သကြားနှင့်သံလွင်ဆီအရောဖြင့်လည်း တိုက်ချွတ်ဆေးကြောပစ်နိုင်ပါတယ်။

၅။ ရံဖန်ရံခါဂရုစိုက်ပေးခြင်း

တစ်လလျှင် နှစ်ကြိမ် ရေနွေးနွေးလေးထဲသို့ ၁၀ မိနစ်မှ ၁၅ မိနစ်ခန့် ခြေထောက်စိမ်ပေးခြင်းက အသားအရေကိုနူးညံ့မှုရှိလာစေပါတယ်။ ပြီးလျှင်တော့ ခြေထောက်ကိုခပ်ကြမ်းကြမ်းပွတ်တိုက်ပေးပြီးနောက် သေသေချာချာအခြောက်ခံ၍ ဗီတာမင်အီးအဆီကိုလိမ်းပေးနိုင်ပါတယ်။

၆။ ခြေအိတ်ဝတ်ဆင်ခြင်း

ခြေအိတ်ဝတ်ဆင်သည့်အလေ့အကျင့်ကိုပြုလုပ်ခြင်းသည် အအေးဒဏ်မှသာမက ပတ်ဝန်းကျင်၏ထိခိုက်အန္တရာယ်များမှလည်း ကာကွယ်ပေးနိုင်ပါတယ်။ ထို့အပြင် ခြေထောက်တွင်လိမ်းခြယ်ထားသည့် ခရင်မ်များသို့ ဖုန်နှင့်အညစ်အကြေးများ ကပ်ပေါင်းစုခြင်း၊ ယူဗွီလှိုင်းများထိရောက်ခြင်းမှလည်း အကာအကွယ်ပေးနိုင်ပါသေးတယ်။

၇။ သက်သောင့်သက်သာရှိသည့်ဖိနပ်များကိုစီးခြင်း

ခြေထောက်အသားကို ယားယံစေခြင်း၊ နာကျင်ထိခိုက်မှုရှိစေနိုင်သည့် ဖိနပ်များကို စီးမည့်အစား သက်သောင့်သက်သာသွားလာလှုပ်ရှားနိုင်မည့် ဖိနပ်များကိုသာ ရွေးချယ်ဝတ်ဆင်ဖို့ အကြံပေးချင်ပါတယ်။ ခြေထောက်ရှိအသားစများ၊ အရွတ်များကို ထိခိုက်ပျက်စီးစေနိုင်သည့် ဒေါက်ဖိနပ်များကို အစဉ်အမြဲစီးခြင်းမှလည်း အတတ်နိုင်ဆုံးရှောင်ရှားစေလိုပါတယ်။