ဆွဲဆောင်မှုအပြည့်ရှိပြီး လူတကာငေးမောနိုင်လောက်မယ့် ခန္ဓာကိုယ်အောက်ပိုင်းအလှကို လိုချင်ပေမယ့်လည်း အချိန်မပေးနိုင်လို့ စိတ်ရှုပ်နေရ ပါသလား။ ဘာမှမပူပါနဲ့။ MyStyle Myanmar ကနေပြီး စာဖတ်သူတို့ရဲ့ ဆန္ဒတွေကို ဖြည့်ဆည်းပေးဖို့ အလွယ်တကူလုပ်ဆောင်နိုင်မယ့် လေ့ကျင့်ခန်း (၇) မျိုးကို ဖော်ပြပေးသွားမှာပါ။

လုံးဝပျက်ကွက်မှုမရှိဘဲ အချိန်မှန်မှန်လုပ်ဆောင်ပေးမယ်ဆိုရင် တပတ်အတွင်းမှာပဲ ရလဒ်ကောင်းတွေကိုမြင်တွေ့လာနိုင်မှာဖြစ်ပြီး မိမိရဲ့ခန္ဓာကိုယ်ပြောင်းလဲလာမှုကို အလွန်သဘောကျနှစ်သက်နိုင်မှာပါနော်။ ဒါကြောင့် ယခုပဲလက်တွေ့လိုက်လုပ်ကြည့်လိုက်ရအောင်။

၁။ ခြေထောက်ဆန့်ပေးခြင်း

၉၀ဒီဂရီ အနေအထားမှာ လှဲပေးပြီး နံရံကိုအမှီယူ၍ ခြေထောက်နှစ်ချောင်းကို ထောင်ထားပေးပါ။ ခြေထောက်တွေကိုလည်း ဆန့်နိုင်သမျှ ဆန့်ထုတ်ပေးပါ။

၂။ ခြေတစ်ဖက်မြှောက်ခြင်း

ပက်လက်အနေအထားတွင် လက်နှစ်ဖက်ကိုဘေးတစ်ဖက်တစ်ချက်စီမှာထားပြီး ခြေထောက်တစ်ဖက်ကို အပေါ်သို့ ဖြည်းဖြည်းချင်း မြှောက်ပြီးဆန့်ထုတ်ပေးပါ။ ၂-၃ မိနစ်ခန့်ကြာအောင်ထားပြီးနောက်မှာ ပြန်ချပြီး နောက်တစ်ဖက်ကိုလည်း ထိုအတိုင်းပဲ လုပ်ဆောင်ပေးပါ။ တစ်နေ့ကို ၁၀ ကြိမ်မှ အကြိမ် ၂၀ အထိလုပ်ပေးပါ။

လေ့ကျင့်ခန်းလုပ်နေစဉ်အတွင်း တင်ပါးများကိုကြမ်းပြင်နှင့်ထိနေစေပါ။

၃။ ခန္ဓာကိုယ်အောက်ပိုင်းလေ့ကျင့်ခန်း

အထက်ဖော်ပြပါ လေ့ကျင့်ခန်းအတိုင်း ပက်လက်အနေအထားမှာရှိပေးပါ။ ပြီးလျှင်တော့ ပုံမှာပြထားသည့်အတိုင်း တင်ပါးကိုအပေါ်သို့ တွန်းပေးပြီး ထို့နောက်မှာ ဖြည်းဖြည်းချင်းပုံမှန်အနေအထားသို့ ပြန်သွားပေးပါ။

၄။ ယောဂလေ့ကျင့်ခန်းအချို့

တင်ပါးနဲ့ခြေထောက်တွေကို တင်းရင်းကျစ်လျစ်မှုရှိစေဖို့ အကောင်းဆုံးနည်းလမ်းတစ်ခုပါပဲ။ ဝဲလျားမှောက်ပြီးနောက် ကလေးများ လေးဖက်ထောက်သွားသလို ရွေ့လျားပေးပါ။ ပြီးလျှင် ဝဲလျားမှောက်အနေအထားနှင့်ပင် ခြေထောက်တစ်ဖက်ကို အနောက်သို့မြှင့်ပေးပါ။ တဖက်ပြီးလျှင် နောက်တစ်ဖက်ကို ဆက်လုပ်ပေးနိုင်ပါတယ်။

၅။ အထောက်အပံ့မပါဘဲ ထိုင်သည့်လေ့ကျင့်ခန်း

လွယ်တယ်ထင်ရပေမယ့်လည်း အလွန်ခက်ခဲတဲ့ လေ့ကျင့်ခန်းတစ်ခုဖြစ်ပါတယ်။ တည့်တည့်ရပ်ပြီးလျှင် ခြေထောက်နှစ်ဖက်ကို ချဲလိုက်ကာ ပုံမှန်အချိန်လိုမျိုး ထိုင်ပေးပါ။ ဒါပေမယ့် ဒီလေ့ကျင့်ခန်းမှာတော့ မည်သည့်ကုလားထိုင်မျှ၊ အထောက်အပံ့ကိုမှ မသုံးပါနှင့်။ လက်နှစ်ဖက်ကိုလည်း ခါးမှာထောက်ထားပေးပါ။

၆။ ဆောင့်ကြောင့်ထိုင်လေ့ကျင့်ခန်း

မတ်တပ်ရပ်ပြီး လက်ကိုခါးမှာထောက်ထားပါ။ ညာခြေကိုအရှေ့သို့ထုတ်ပြီး အတည့်အနေအထားမှာ ကွေးပေးပါ။ တချိန်တည်းမှာပဲ ဘယ်ခြေကိုလည်း အနောက်ဖက်သို့ဆန့်ထုတ်ပေးပါ။ ခြေထောက်နှစ်ဖက်ကို အလှည့်အပြောင်းလုပ်ပြီး တနေ့လျှင် အနည်းဆုံး ၁၀ ကြိမ်မှ အကြိမ် ၂၀ အထိ လုပ်ဆောင်ပေးရန်လိုအပ်ပါတယ်။

၇။ အခုန်လေ့ကျင့်ခန်း

ခြေထောက်နှစ်ဖက်ကို အနည်းငယ်ခြားပေးပြီး ဒူးကွေးလိုက်ကာ ခြေဖနောင့်ကို အားနှင့်တွန်းပေးမှ ခြေချောင်းများနှင့် ခုန်မိမှာဖြစ်ပါတယ်။ ပုံမှန်အနေအထားကို ပြန်ရောက်သွားပြီဆိုရင် ချက်ချင်းဆိုသလို နောက်ထပ်ဆက်လက်လုပ်ဆောင်ပေးပါ။

ကဲ….ဒီလိုမျိုး လွယ်ကူတဲ့လေ့ကျင့်ခန်းလေးတွေကို ဖော်ပြပေးပြီးပြီဆိုတော့ စာဖတ်သူတို့လည်း အိမ်မှာအခက်အခဲမရှိ လုပ်ဆောင်ပြီး ကျစ်လျစ်လှပတဲ့ ကိုယ်ခန္ဓာလေးတွေကို ပိုင်ဆိုင်နိုင်ကြပါစေနော်………