မိသားစုဘဝတစ်ခု တည်ထောင်ထားပြီဖြစ်တဲ့ ၂၀၀၀ ခုနှစ်က ကလေးသရုပ်ဆောင် (၇) ဦး

ဟယ်ရီပေါ်တာရဲ့ အခင်ဆုံးသူငယ်ချင်း ရွန်းဝီစလီကနေပြီးတော့ Spy Kids ဇာတ်ကားထဲက Carmen နဲ့ Juni Cortez မောင်နှမနှစ်ယောက်တို့လို ကလေးသရုပ်ဆောင်တွေဟာ ကြည့်ရှုသူပရိတ်သတ်တွေ စွဲစွဲမြဲမြဲ မှတ်မိနေခဲ့စေတဲ့ ဇာတ်ကောင်တွေဖြစ်ပါတယ်။

ဒါကြောင့်မို့လည်း တချို့ကြည့်ရှုသူတွေဆိုရင် သရုပ်ဆောင်တွေရဲ့ နာမည်အရင်းတွေထက် သူတို့ရဲ့ဇာတ်ကောင်နာမည်တွေနဲ့ပဲ တွဲပြီးသိတတ်ကြပါတယ်။ ရုတ်တရက်ကြည့်လိုက်ရင်တော့ ဒီဇာတ်ကားတွေကြည့်ခဲ့တာ မနေ့တစ်နေ့ကလို ထင်မှတ်နေရပေမယ့် တကယ်တမ်းအချိန်ပြန်တွက်ကြည့်လိုက်မယ်ဆို တော်တော်လေးကို ကြာမြင့်ခဲ့ပါပြီ။

အချိန်တွေကြာမြင့်ခဲ့တာနဲ့အမျှ အရွယ်ရောက်လာကြပြီဖြစ်တဲ့ ဒီကလေးသရုပ်ဆောင်တွေလည်း သာမန်လူတွေလို ချစ်ရတဲ့သူနဲ့အတူ အိမ်ထောင်တစ်ခုကို တည်ထောင်ထားပြီးပါပြီ။ ကဲ ဒါဆိုရင် ဘယ်ကလေးသရုပ်ဆောင်တွေကတော့ ကလေးအဖေ၊ ကလေးအမေတွေဖြစ်နေကြပြီလဲဆိုတာ အခုပဲကြည့်လိုက်ရအောင်ပါ။

Rupert Grint

ဟယ်ရီပေါ်တာရဲ့ အမာခံပရိတ်သတ်တွေအတွက်တော့ ဟယ်ရီပေါ်တာရဲ့သူငယ်ချင်းကောင်း ရွန်းဝီစလီကို အင်မတန်ရင်းနှီးကြမှာပါ။ နာမည်ရင်း Rupert Grint လို့ခေါ်ပြီး ၂၀၁၁ ခုနှစ်ကတည်းက တွဲခုတ်နေတဲ့ သူ့ရဲ့ချစ်သူနဲ့အတူ Wednesday လို့ခေါ်တဲ့ သမီးလေးကို မွေးဖွားထားပါတယ်။

Kevin Jonas

Kevin Jonas ကတော့ မကြာသေးခင်ကမှ အိမ်ထောင်ပြုခဲ့ကြတဲ့ Jonas Brothers နှစ်ယောက်လိုမဟုတ်ဘဲ ဇနီး Danielle နဲ့ ၂၀၀၉ ခုနှစ်ကတည်းက စောစောစီးစီးအိမ်ထောင်ကျကာ ချစ်စရာကောင်းတဲ့ သမီးလေးနှစ်ယောက်ပိုင်ဆိုင်ထားပါတယ်။

David Henrie

ဒစ်စနေးက ထုတ်လွှင့်ခဲ့တဲ့ Wizards of Waverly Place ဇာတ်ကားထဲမှာ ဆယ်လီနာရဲ့ အစ်ကိုနေရာက သရုပ်ဆောင်ခဲ့တဲ့ David Henrie ဟာဆိုရင်လည်း ချစ်ဇနီး Maria Cahill နဲ့ ၂၀၁၇ ကတည်းက အိမ်ထောင်ပြုခဲ့ပြီး လက်ရှိမှာ ကလေးနှစ်ယောက်အဖေဖြစ်နေပါပြီ။

Emma Roberts

ကမ္ဘာကျော်မင်းသမီး Julia Robert ရဲ့ တူမလေး Emma Roberts ကိုလည်း Wild Child အပြင် Nickelodeon ချန်နယ်လ်ရဲ့ တီဗီစီးရီး Unfabulous in the ’00s နဲ့ လူသိများလှပါတယ်။ ခင်ပွန်း Garrett Hedlund နဲ့ သားလေးတစ်ဦး မွေးထားပါတယ်။

Ashley Tisdale

ဒစ်စနေးမှ ထုတ်လွှင့်ခဲ့တဲ့ High School Musical ဆိုရင်လည်း အင်မတန်လူကြိုက်များခဲ့ပါတယ်။ နာမည်ကျော်သရုပ်ဆောင်တွေအများကြီးကို မွေးထုတ်ပေးခဲ့တဲ့အထဲကမှ သူဌေးသမီးလေး Sharpay အဖြစ် သရုပ်ဆောင်ခဲ့တဲ့ Ashley Tisdale ကတော့ ခင်ပွန်း Christopher French နဲ့ ၂၀၁၄ ခုနှစ်မှာ လက်ထပ်ခဲ့ကာ သမီးလေးမွေးထားပါတယ်။

Alexa PenaVega

Spy Kids ဇာတ်လမ်းတွဲရဲ့ မောင်နှမနှစ်ယောက်ထဲက အစ်မဖြစ်သူ ကာမန်ကိုလည်း ပရိတ်သတ်တွေမှတ်မိကြမယ်ထင်ပါတယ်။ သူမရဲ့နာမည်ရင်းက Alexa PenaVega ဖြစ်ပြီး လက်ရှိမှာတော့ ခင်ပွန်း Carlos PenaVega နဲ့အတူ သားယောကျ်ားလေးနှစ်ဦးနဲ့ သမီးလေးတစ်ယောက် မွေးထားပါတယ်။

Daryl Sabara

Spy Kids ဇာတ်ကားထဲမှာ ကာမန်ရဲ့မောင်လေး ဂျူနီအဖြစ် သရုပ်ဆောင်ခဲ့တဲ့ Daryl Sabara ကတော့ ကမ္ဘာကျော်အဆိုတော် Meghan Trainor နဲ့ လက်ထပ်ခဲ့ပြီး ဖေဖော်ဝါရီ (၈) ရက်နေ့မှာ Riley လို့ခေါ်တဲ့ သားဦးလေးရဲ့ ဖေဖေဖြစ်လာခဲ့ပါတယ်။

Image Source: Brightside