ပျိုမေတို့အားလုံးပဲ မင်္ဂလာပါနော်။ ပျိုမေတို့အနေနဲ့ တစ်နေ့တာလှုပ်လှုပ်ရှားရှား လေ့ကျင့်ခန်းတွေ ပြုလုပ်ပြီးတဲ့နောက်မှာ အားကုန်ပြီး ပင်ပန်းထားတဲ့အရှိန်ကြောင့် အားပြန်ပြည့်ဖို့အတွက် တစ်ခုခုစားသုံးပေးဖို့ မဖြစ်မနေလိုအပ်ပါတယ်။ ဒီလိုမဟုတ်ဘဲ ဘာမှမစားဘဲနေမယ်ဆိုရင် အားအင်ကုန်ခမ်းခြင်းကြောင့် နောက်နေ့လေ့ကျင့်ခန်းလုပ်ဖို့ခက်ခဲစေမယ့်အပြင် ခန္ဓာကိုယ်တွင်း စိတ်ဖိစီးမှုရာခိုင်နှုန်း မြှင့်တက်ပြီး ဝိတ်ပိုတက်လာတာမျိုးတွေ ဖြစ်လာနိုင်ပါတယ်။ ဒါကြောင့် လေ့ကျင့်ခန်းလုပ်ပြီးနောက်မှာ မှန်ကန်တဲ့ အစားအသောက်တွေကို ပမာဏအနေတော် စားသုံးပေးဖို့မမေ့ပါနဲ့။ ဒီတစ်ခေါက်မှာတော့ ပျိုမေတို့အတွက် လေ့ကျင့်ခန်းလုပ်ပြီးချိန် စားသုံးနိုင်တဲ့ အစားအသောက်တွေအကြောင်းကိုမျှဝေပေးလိုက်ပါတယ်။
၁။ Greek Yogurt
လေ့ကျင့်ခန်းလုပ်ပြီးချိန်မှာ Cortisol လို့ခေါ်တဲ့ စိတ်ဖိစီးမှုဟော်မုန်းတစ်မျိုးမြင့်တက်လာတတ်ပါတယ်။ Greek Yogurt မှာပါဝင်တဲ့ကယ်စီယမ်ဓာတ်က Cortisol ပမာဏကိုသဘာဝအတိုင်း လျော့ချပေးနိုင်တဲ့အပြင် ကိုယ်ခန္ဓာအတွက်လိုအပ်တဲ့ ပရိုတင်းနဲ့ မဂနီဆီယမ်ပါဝင်တာကြောင့် အရိုးနဲ့ ကြွက်သားသန်မာဖို့အတွက် လည်းကူညီပေးနိုင်ပါတယ်။ ဒါ့အပြင် သူ့မှာပါဝင်တဲ့ ပိုတက်ဆီယမ်နဲ့ ဗီတာမင်ဘီဓာတ်ကလည်း ပြင်းထန်တဲ့ လေ့ကျင့်ခန်းတွေကြောင့် အရိုးအဆစ်ရောင်ရမ်းခြင်းတွေ မဖြစ်အောင်လျှော့ချပေးနိုင်ပါတယ်။
၂။ Berries
ဘယ်ရီသီးတွေမှာလည်း ပိုတက်ဆီယမ်ပါဝင်တာကြောင့် နှလုံးနဲ့ အရိုးကျန်းမာရေးကိုအားဖြည့်ပေးနိုင်ပြီး သူ့မှာပါဝင်တဲ့ သဘာဝအချိုဓာတ်က သွေးတွင်းသကြားပမာဏကိုလည်း ထိန်းညှိပြီးသားဖြစ်စေပါတယ်။ ဗီတာမင်စီနဲ့ Antioxidant ပါဝင်မှုလည်း မြင့်မားတာကြောင့် ကိုယ်ခံအားကောင်းစေဖို့လည်း ကူညီပေးနိုင်ပါတယ်။
၃။ Bananas
အပြေးလေ့ကျင့်ခန်းတွေလိုမျိုး ပြင်းထန်တဲ့လှုပ်ရှားမှုတွေလုပ်ပြီးတဲ့အခါမှာ အလွယ်တကူနဲ့ဗိုက်ပြည့်စေတဲ့ အစားအသောက်ဖြစ်တဲ့ ဌက်ပျောသီးကိုစားသုံးသင့်ပါတယ်။ ဌက်ပျောသီးတွေမှာ စိတ်ကျန်းမာရေးနဲ့ ကိုယ်ခန္ဓာစွမ်းအင်ကိုအားဖြည့်ပေးနိုင်တဲ့ ပိုတက်ဆီယမ်၊ ကစီဓာတ်နဲ့ ဗီတာမင်ဘီဓာတ်တွေ ကြွယ်ဝစွာ ပါဝင်ပါတယ်။
၄။ Leafy Green
အစိမ်းရောင်ရှိတဲ့ဟင်းရွက်တွေက ကယ်လိုရီပါဝင်မှုနည်းပြီး ဗီတာမင်နဲ့သတ္တုဓာတ်ကြွယ်ဝတဲ့ အစားအသောက်တွေပဲဖြစ်ပါတယ်။ ဟင်းသီးဟင်းရွက်များများစားခြင်းက ဆီးဝမ်းမှန်စေတဲ့အပြင် နှလုံးကျန်းမာရေးအားကောင်းဖို့အတွက်လည်း ပံ့ပိုးပေးနိုင်ပါတယ်။ ဥပမာအနေနဲ့ ကန်စွန်းရွက်၊ ဟင်းနုနွယ်၊ ကိုက်လန်နဲ့ ပန်းဂေါ်ဖီစိမ်းစတာတွေကို နေ့စဉ်ပုံမှန်စားသုံးပေးဖို့လိုပါတယ်။
၅။ Egg Whites
ကြက်ဥအကာမှာ Carbohydrates နဲ့ အဆီပါဝင်မှုမရှိတဲ့အပြင် ပရိုတင်းဓာတ်ပါဝင်မှုမြင့်မားတာကြောင့် လေ့ကျင့်ခန်းလုပ်လေ့ရှိသူတွေနဲ့ အလွန်သင့်တော်တဲ့ အစားအစာဖြစ်ပါတယ်။ ပရိုတင်းဓာတ်က လေ့ကျင့်ခန်းလုပ်ပြီးချိန်မှာ ကိုယ်ခန္ဓာကြွက်သားဖွဲ့စည်းတည်ဆောက်မှု ပုံမှန်လည်ပတ်စေဖို့အတွက် ကူညီပေးနိုင်ပါတယ်။
၆။ Almonds
ဗာဒံစေ့တွေမှာ နှလုံးကျန်းမာရေး၊ ကြွက်သားဖွံ့ဖြိုးမှုနဲ့ သွေးလည်ပတ်မှုစတာတွေကို အားကောင်းအောင် ပံ့ပိုးပေးနိုင်တဲ့ ပရိုတင်းနဲ့ အခြားအာဟာရဓာတ်တွေ ကြွယ်ဝစွာပါဝင်နေပါတယ်။ ဒါကြောင့်ဆားပါဝင်မှုမရှိတဲ့ ဗာဒံစေ့တွေက လေ့ကျင့်ခန်းလုပ်ပြီးချိန် စားသုံးဖို့အသင့်တော်ဆုံး အဆာပြေအစားအစာတွေထဲကတစ်ခု ဖြစ်ပါတယ်။
၇။ Oranges
လိမ္မော်သီးလိုမျိုး အရည်ရွှမ်းပြီး ဗီတာမင်စီကြွယ်ဝတဲ့အသီးတွေက ကြွက်သားနဲ့အဆစ်အမြစ်ရောင်ရမ်းခြင်း တွေကို သက်သာစေနိုင်ပါတယ်။ လိမ္မော်သီးတွေမှာ ပိုတက်ဆီယမ်နဲ့ အမျှင်ဓာတ်တွေလည်းပါဝင်နေပြီး သူ့မှာပါဝင်တဲ့အရည်က ကိုယ်ခန္ဓာအတွင်း ရေဓာတ်ခန်းခြောက်မှုမရှိအောင်လည်း ပံ့ပိုးပေးနိုင်ပါတယ်။
Photo Source: Pinterest
By MyStyle Myanmar
