ဖက်ရှင်ရေစီးကြောင်းက နေ့စဉ်နဲ့အမျှ ပြောင်းလဲနေတာပဲဖြစ်ပါတယ်။ လှပပြီး ဖက်ရှင်ကျချင်တဲ့ မိန်းကလေးတွေကလည်း ဖက်ရှင်ရေစီးကြောင်းနောက် လိုက်ရတာလည်း အမောပါပဲ။ ဘယ်လောက်ပဲ ဖက်ရှင်နဲ့ အလှအပကို ဦးစားပေးတယ်ပဲပြောပြော ကျန်းမာရေးအတွက်ကိုလည်း ထည့်စဉ်းစားပေးရပါဦးမယ်။
ဒီတစ်ခါမှာတော့ ပျိုမေလေးတို့ရဲ့ ကျန်းမာရေးအတွက် စဉ်းစားတယ်ဆိုရင် နေ့စဉ်နေ့တိုင်း စွဲစွဲမြဲမြဲ မဝတ်သင့်တဲ့ အဝတ်အစားလေးတွေအကြောင်း ဖော်ပြပေးလိုက်ရပါတယ်။
Skinny Jeans
တင်ပါးလေးတွေ ကိတ်ကြောင်း၊ ပေါင်တံနဲ့ ခြေသလုံးလေးတွေ လှပကြောင်း ပြသချင်တဲ့အခါ ကိုယ်ကျပ်ဂျင်းဘောင်းဘီလေးတွေ ဝတ်ဆင်လေ့ရှိကြပါတယ်။ အမှန်တကယ်လည်း ခန္ဓာကိုယ်ကောက်ကြောင်းပေါ်ပြီး လှပစေတဲ့ ဘောင်းဘီတစ်မျိုးပါပဲ။ ဒါပေမဲ့ ကိုယ်ကျပ် ဂျင်းဘောင်းဘီဝတ်နေတဲ့အချိန်မှာ ခန္ဓာကိုယ်ရဲ့သွေးလှည့်ပတ် စီးဆင်းမှုကို တားဆီးထားသလိုဖြစ်စေပြီး ကျန်းမာရေးအတွက် မကောင်းပါဘူး။
ဒေါက်မြင့်ဖိနပ်
ဝတ်ထားရင် ခန္ဓာကိုယ်အချိုးအစားမှန်စေပြီး စမတ်ကျစေတာက ဒေါက်မြင့်ဖိနပ်ဖြစ်ပါတယ်။ စမတ်ကျတယ်ဆိုတိုင်းလည်း နေ့တိုင်း မဝတ်သင့်ပါဘူး။ နေ့တိုင်းဝတ်မယ်ဆိုရင် ခါးနားခြင်း၊ ခြေထောက်နာခြင်း၊ ခြေထောက်ရောင်ခြင်းတို့ ခံစားရနိုင်ပါတယ်။
Push-Up Bra
ယနေ့ခေတ်မှာ မိန်းကလေးတွေကြား ရေပန်းစားနေတာကတော့ Push-Up Bra ပဲဖြစ်ပါတယ်။ ပျိုမေလေးတို့ကို ဆွဲဆောင်မှုတိုးစေတဲ့ ဘရာလေးပါပဲ။ ဒါပေမဲ့ ရံဖန်ရံခါပဲ ဝတ်ဆင်သင့်ပါတယ်။ နေ့တိုင်းဝတ်မယ်ဆိုရင် ရင်သားနေရာက သွေးကြောလေးတွေကို ပိတ်ဆို့ထားသလိုဖြစ်ပြီး ရင်သားကို ဖိအားပေးနေတာကြောင့် ရင်သားကင်ဆာဖြစ်ပွားနိုင်ချေများပါတယ်။
နေကာမျက်မှန်
နေပူထဲ ထွက်တဲ့အခါ မျက်လုံးကို အကာအကွယ်ဖြစ်စေဖို့အတွက် နေကာမျက်မှန်တွေ တပ်လေ့ရှိကြပါတယ်။ ဒါပေမဲ့ နေကာမျက်မှန်ကို နေအလင်းရောင် ပြင်းပြစူးရှနေတဲ့အချိန်မှာပဲ တပ်သင့်ပါတယ်။ ညနေစောင်းအချိန်၊ အခန်းတွင်း အလင်းရောင်မှိန်တဲ့အချိန်တွေမှာ တပ်ဆင်ထားမယ်ဆိုရင် မျက်လုံးကို ဖိအားပိုဖြစ်စေပြီး မျက်စိထိခိုက်တတ်ပါတယ်။ နောက်ထပ် အရေးအကြီးဆုံးအချက်ကတော့ UV ဒဏ်ကို အပြည့်အဝကာကွယ်ပေးနိုင်တဲ့ အရည်အသွေးမြင့် နေကာမျက်မှန်ကို ရွေးချယ်တပ်ဆင်ဖို့ပါပဲ။ အရည်အသွေးမကောင်းတဲ့ နေကာမျက်မှန်တွေကလည်း သင့်မျက်စိကို ထိခိုက်စေနိုင်တာမို့လို့ပါ။
ဘေးလွယ်အိတ် အကြီး
သယ်ဆောင်ရလွယ်ကူဖို့နဲ့ ပစ္စည်းအစုံထည့်လို့ရအောင်ဆိုပြီး ဘေးလွယ်အိတ်အကြီးတွေ လွယ်တဲ့အခါ ပုခုံးက ဘက်မမျှတဲ့ဝန်ကို ထမ်းထားရတဲ့အတွက်ကြောင့် ကြွက်သားများ နာကျင်ခြင်း၊ ခါးနာခြင်းနဲ့ နာ့ဗ်ကြောတွေကို ထိခိုက်စေနိုင်ပါတယ်။
ညအိပ်ဝတ်စုံ
ညဝတ်အင်္ကျီတွေက သက်သောင့်သက်သာဖြစ်ပြီး ပေါ့ပါးလွတ်လပ်တဲ့အင်္ကျီလေးတွေပါပဲ။ ဒါပေမဲ့ အရမ်းကျပ်လွန်းတဲ့ ညဝတ်အင်္ကျီတွေက လေဝင်လေထွက်မကောင်းတဲ့အတွက်ကြောင့် ဘက်တီးရီးယားများ ပေါက်ဖွားနိုင်ပြီး အရေပြား ယားယံခြင်းတို့ကို ဖြစ်စေနိုင်ပါတယ်။ မိန်းမကိုယ်အတွက် ဘေးအန္တရာယ်ဖြစ်စေနိုင်တာကြောင့် အရေပြား အထိအခိုက်မခံတဲ့သူတွေအနေနဲ့ ညအိပ်ဝတ်စုံမဝတ်ဘဲ အိပ်ခြင်း၊ အတွင်းခံမဝတ်ဘဲ အိပ်ခြင်းတို့ကို ပြုလုပ်သင့်တယ်လို့ အကြံပေးထားကြပါတယ်။
Source: Brightside.me
