ဆောင်းတွင်းမှာ အသားခြောက်တဲ့ပြဿနာနဲ့ ဝက်ခြံ၊ အဆီဖုပြဿနာတွေကြောင့် စိတ်ညစ်နေရတဲ့သူတွေအတွက် ဈေးသက်သာပြီး ကိုယ်တိုင်လုပ်နိုင်တဲ့ Face Mask တွေအကြောင်းကို ပြောပြချင်ပါတယ်။ အရေပြားကျွမ်းကျင်ပညာရှင်အချို့ကိုယ်တိုင် အကြံပေးထားတဲ့နည်းတွေဖြစ်တာကြောင့် ဆောင်းရာသီမှာ သဘာဝပစ္စည်းတွေသုံးပြီး အသားအရေထိန်းသိမ်းချင်သူတွေနဲ့ အဆင်ပြေစေမှာပါ။

ပျိုမေတို့နဲ့ရင်းနှီးပြီးသားဖြစ်တဲ့ Face Mask တွေကိုတော့ အရေပြားပေါ်ကဆဲလ်သေတွေဖယ်ရှားဖို့၊ ချွေးပေါက်ထဲက အဆီနဲ့အညစ်အကြေးတွေသန့်စင်စေဖို့နဲ့ အစိုဓာတ်ရဖို့စသဖြင့် အသုံးပြုလေ့ရှိပါတယ်။ Face Mask အမျိုးမျိုးမှာ မတူညီတဲ့သူ့အာနိသင်နဲ့သူရှိတာကြောင့် ကိုယ့်အသားအရေလိုအပ်ချက်နဲ့ကိုက်ညီတဲ့ အကျိုးကျေးဇူးရစေမယ့် Mask တွေကိုရွေးချယ်အသုံးပြုဖို့ အရေးကြီးဆုံးပါပဲ။ ဆောင်းရာသီရောက်လာတဲ့အခါ အစိုဓာတ်ခန်းခြောက်လွယ်တာကြောင့် အထူးသဖြင့် Dry Skin ရှိသူတွေအနေနဲ့ အစိုဓာတ်ပေးနိုင်တဲ့ ပျားရည်၊ ဗာဒံဆီနဲ့ ထောပတ်သီးစတဲ့ သဘာဝပစ္စည်းတွေပါဝင်တဲ့ Mask တွေကိုအသုံးပြုဖို့လိုပါတယ်။

၁။ ပျားရည်နဲ့ ကြက်ဥအနှစ်


ပျားရည်က Skin Type တော်တော်များများနဲ့အဆင်ပြေပါတယ်။ ဒါကြောင့် ပျားရည်ဇွန်းတစ်ဝက်၊ ကြက်ဥအနှစ်တစ်လုံးနဲ့ နို့မှုန့်တို့ကို အနှစ်ရအောင်ရောမွှေပြီး မျက်နှာအနှံ့လိမ်းပေးပါ။ ပြီးနောက် မိနစ် ၂၀ လောက် ခြောက်အောင်ကပ်ထားပြီး ရေနဲ့ဆေးချပေးနိုင်ပါတယ်။

၂။ ပျားရည်နဲ့ ကြက်ဥအကာ


အဆီပြန်တတ်တဲ့သူတွေနဲ့ သင့်တော်တဲ့နည်းလမ်းဖြစ်ပါတယ်။ ပျားရည်ဇွန်းတစ်ဝက်နဲ့ ကြက်ဥအကာတို့ကို အနှစ်ဖြစ်တဲ့အထိသမအောင်မွှေပေးပါ။ ဒိန် (Curd) တစ်ဇွန်းခန့်နဲ့ နနွင်းမှုန့်အနည်းငယ်ကိုပါ ထည့်မွှေပေးနိုင်ပါတယ်။ သူ့ကိုလည်း မိနစ် ၂၀ လောက်ထားပေးပါ။ အသားခြောက်ခြင်းသက်သာပြီး အစိုဓာတ်ပြည့်လာတဲ့အသားအရေကို ရရှိစေပါလိမ့်မယ်။

၃။ သင်္ဘောသီးအမှည့်


ဒီနည်းက လုပ်ရတာအရမ်းလွယ်ပါတယ်။ သင်္ဘောသီးမှည့်အနည်းငယ်ကို အနှစ်ရအောင်ကြိတ်ပြီး မျက်နှာပေါ်ခပ်ပါးပါးလိမ်းပေးရမှာပါ။ ၁၅ မိနစ်ခန့်ထားပြီးနောက်ရေဆေးချနိုင်ပါတယ်။ သင်္ဘောသီးမှာ ဆဲလ်သေတွေဖယ်ရှားပြီး အသားအရေသန့်စင်စေတဲ့အာနိသင်တွေပါဝင်ပါတယ်။

၄။ မုန်လာဥနီ


မုန်လာဥနီက အသားအရေကိုအားဖြည့်ပေးနိုင်တဲ့ Vitamin A ဓာတ်များစွာပါဝင်နေတဲ့အသီးဖြစ်ပါတယ်။ ဒါကြောင့် ခပ်ပါးပါးခြစ်ထားတဲ့ မုန်လာဥနီအနည်းငယ်ကို မျက်နှာမှာ ၁၅ မိနစ်ခန့်ကပ်ထားပေးပါ။ ပြီးနောက် ပြန်လည်ရေဆေးချနိုင်ပါတယ်။

၅။ ထောပတ်သီး


ထောပတ်သီးအမှည့်နဲ့ ပျားရည်၊ အုန်းဆီတစ်ဇွန်းစီတို့ကို သမအောင်မွှေပြီး မျက်နှာမှာလိမ်းပေးနိုင်ပါတယ်။ ဒါကိုလည်း ပုံမှန် Mask တွေလို မိနစ် ၂၀ ခန့်ထားပြီးနောက် ရေနဲ့ပြန်လည်ဆေးချပေးပါ။

၆။ ပျားရည်နဲ့ Orange Juice


ဆောင်းတွင်းမှာ အသားအရေနူးညံ့ချောမွှတ်စေဖို့ ပျားရည်နဲ့ Orange Juice တစ်ဇွန်းဆီတို့ကို ရောပြီး သင့်မျက်နှာအနှံ့ပေါင်းတင်ပေးနိုင်ပါတယ်။ ဒီ သဘာ၀ Mask ကိုလည်း မိနစ် ၂၀ လောက်အကြာမှာ မျက်နှာကို ရေနဲ့ပြောင်အောင်ဆေးကြောပေးရပါမယ်။

Photo Source: Pinterest

By MyStyle Myanmar