အသက်ရှည်ကျန်းမာချင်တာကတော့ လူသားတိုင်းရဲ့ ဆန္ဒပါပဲ။ အသက်ရှည်ဖို့အတွက် ကျန်းမာရေးနဲ့ညီညွတ်တဲ့ နေထိုင်မှုပုံစံနဲ့ ရုပ်ပိုင်းဆိုင်ရာ လေ့ကျင့်ခန်းတွေကို ပြုလုပ်ပေးဖို့လိုပါတယ်။ အားကစားလုပ်တာက သင့်အသက်ကို ပိုရှည်စေတယ်လို့ လေ့လာမှုတစ်ခုမှာ ပြောပြထားပါတယ်။ ဒါပေမဲ့ ဘယ်လေ့ကျင့်ခန်းလုပ်ရမလဲဆိုတာလည်း သိဖို့လိုပါတယ်။ တစ်ချို့လေ့ကျင့်ခန်းတွေက သင့်နှလုံးအတွက် ကောင်းမွန်ပါတယ်။

တချို့ကျတော့ ထိခိုက်ဒဏ်ရာရခြင်းကနေ ကာကွယ်ပေးနိုင်ပါတယ်။ စိတ်ဖိစီးမှုတွေ လျှော့ချပေးနိုင်ပါတယ်။ ဒီတစ်ခေါက်မှာတော့ လူအားလုံးရဲ့ ဆန္ဒတစ်ခုဖြစ်တဲ့ သက်တော်ရာကျော်ရှည်စေမယ့် လေ့ကျင့်ခန်း ၆ ခုအကြောင်းပြောပြချင်ပါတယ်။ သင်ကိုယ်တိုင် မလုပ်ရင်တောင် သင်ချစ်တဲ့ သင့်ရဲ့ မိဘတွေကို လုပ်ခိုင်းလို့ရပါတယ်။

၁။ တင်းနစ်အပါအဝင် အဖွဲ့လိုက်ကစားတဲ့ ကစားနည်းတွေ

Copenhagen City နှလုံးလေ့လာရေးအဖွဲ့အစည်းရဲ့ လေ့လာမှုတစ်ခုမှာ အုပ်စုလိုက်ကစားတဲ့ ကစားနည်းတွေဟာ တစ်ယောက်တည်းကစားရတဲ့ ကစားနည်းတွေထက် အသက်ပိုရှည်စေပါတယ်တဲ့။ အဖွဲ့လိုက်စိတ်ဓာတ်နဲ့ အချင်းချင်းဆက်သွယ်မှုတွေက သင့်ရဲ့ စိတ်ကျန်းမာရေးကို ပိုကောင်းမွန်စေပြီး လေ့ကျင့်ခန်းပိုလုပ်ဖြစ်စေပါတယ်။

ပုံမှန်အားကစားလုပ်ပေးတာက အသက်ကြီးလာတဲ့အချိန်မှာ မှတ်ဉာဏ်ကောင်းစေပြီး အာရုံစူးစိုက်နိုင်စွမ်းကောင်းမွန်စေပါတယ်။ ကျွန်ုပ်တို့ မြန်မာနိုင်ငံမှာ ဆိုရင်တော့ ဘောလုံးကန်တာ၊ ခြင်းခတ်တာတို့ပါ။

၂။ ဝိတ်ကျစေတဲ့ Callanetics လို့ခေါ်တဲ့ လေ့ကျင့်ခန်းများ

Callanetics ဆိုတာကတော့ ထပ်ခါထပ်ခါ ပြုလုပ်ရတဲ့ လေ့ကျင့်ခန်းလို့ အဓိပ္ပာယ်ရပါတယ်။ ဒီလေ့ကျင့်ခန်းတွေက ခန္ဓာကိုယ်ထဲက ကြွက်သားတိုင်းကို လှုံ့ဆော်ပေးပါတယ်။ အဆီဆဲလ်တွေကို လောင်ကျွမ်းစေပါတယ်။

Plank ထောက်တာ၊ Side band ခါးစောင်းတာ၊ အိပ်ထမတင်စတဲ့ လေ့ကျင့်ခန်းတွေက Callanetics လေ့ကျင့်ခန်းအမျိုးအစားတွေပါ။ အသက်အရွယ်မရွေး ဒီလေ့ကျင့်ခန်းတွေကို ပြုလုပ်နိုင်ပြီး အသက်ကြီးလာတဲ့အချိန် အဝလွန်ခြင်းကို တားဆီးပေးနိုင်ပါတယ်။

၃။ ပြေးခြင်း

ပြေးခြင်းက သင့်ခန္ဓာကိုယ်ထဲက ကိုလက်စထရောဓာတ်ကို လျှော့ချပေးနိုင်ပါတယ်။ ကိုလက်စထရောများတာက နှလုံးသွေးကြောဆိုင်ရာ ရောဂါတွေကို ဖြစ်စေနိုင်ပါတယ်။ ပြေးခြင်းက ကိုယ်တွင်းကိုလက်စထေရောကို ထိန်းညှိပေးနိုင်ပါတယ်။ ဒါ့အပြင် ပြေးတာက နှလုံးကို လေ့ကျင့်ပေးသလိုဖြစ်ပြီး ပိုကျန်းမာစေပါတယ်။ ပုံမှန်ပြေးပေးတာက နှလုံးရောဂါဖြစ်နိုင်ချေကို နည်းပါးစေတာကြောင့် အသက်ပိုရှည်စေပါတယ်။

၄။ Gravity ကိုဆန့်ကျင်တဲ့ ယောဂလေ့ကျင့်ခန်း

ဒီယောဂအမျိုးအစားက အထိုင်များတဲ့အချိန် တင်းလာတဲ့ သင့်ကြောရိုးတင်းအားကို လျေျာ့ချပေးပါတယ်။ ကြိုးယောဂလို့ခေါ်ပါတယ်။ ကြိုးနဲ့ လေ့ကျင့်ရတာပါ။ မြန်မာနိုင်ငံမှာတော့ တွင်တွင်ကျယ်ကျယ် မဆော့သေးပါဘူး။ ကြိုးယောဂသင်ပေးတဲ့ ယောဂဆရာတွေတော့ရှိပါတယ်။ သင့်ကြောရိုးဆန့်ပေးတာက ကြောရိုးချပ်ပြားတွေကို အားအင်ပေးပြီး ကျန်းမာစေပါတယ်။ ဒါကြောင့် အသက်ကြီးလာတဲ့အချိန် ဖြစ်တတ်တဲ့ ခါးကုန်းတာတွေကို မဖြစ်စေတော့ပါဘူး။ တရားထိုင်တာကလည်း သင့်စိတ်ကို အေးချမ်းစေပါတယ်။ Spider-Man ဖြစ်မှ ကင်းမြီးကောက်ထောက်ရတာမဟုတ်ပါဘူး။ ဒီယောဂနဲ့လည်း အပေါ်အောက် လေ့ကျင့်ခန်းလုပ်နိုင်ပါတယ်နော်။

၅။ ရေကူးခြင်း

ရေကူးခြင်းက သင့်နှလုံးကျန်းမာရေးအတွက် ကောင်းမွန်စေပြီး ကြွက်သားတွေကို ခွန်အားပေးပါတယ်။ ရေကူးခြင်းရဲ့ ထိပ်ဆုံးအကျိုးကျေးဇူးကတော့ အဆုတ်စွမ်းဆောင်ရည်ကို တိုးတက်စေတာပါ။ ရလဒ်အနေနဲ့ ဦးနှောက်လုပ်ငန်းမှာ အရေးပါတဲ့ အောက်ဆီဂျင်ကို ပိုရရှိစေပြီး အာရုံစိုက်နိုင်စွမ်း ပိုကောင်းမွန်စေပါတယ်။ အဆုတ်ကောင်းတာကြောင့် သက်လုံကောင်းစေပြီး လွယ်လွယ်နဲ့ မပင်ပန်းတော့ပါဘူး။

၆။ အကြောဆန့်ခြင်း

ကျွန်ုပ်တို့ရဲ့ ကြွက်သားတွေကို သန်မာပြီး ကျန်းမာစေဖို့ ပုံမှန်အကြောလျှော့ပေးသင့်ပါတယ်။ ပျော့ပျောင်းတဲ့ကြွက်သားတွေက လေ့ကျင့်ခန်းလုပ်ရာမှာ ပိုအဆင်ပြေစေပြီး လှုပ်ရှားမှုအမျိုးမျိုးပြုလုပ်နိုင်ပါတယ်။ အကသမားတွေ ပုံမှန်အကြောလျှော့ပေးရတာ ဒါကြောင့်ပါ။ ကျွန်ုပ်တို့ အသက်အရွယ်ရလာတာနဲ့အမျှ ဒီအချက်က အရေးကြီးလာပါတယ်။ အသက်ကြီးလာလေ လှုပ်ရှားနိုင်စွမ်းကျလာလေပါပဲ။ အကြောဆန့်ပေးတာကြောင့် ဒီပြဿနာတွေမဖြစ်နိုင်တော့ပါဘူး။ ထိမိခိုက်မိလို့ ကြွက်သားတွေ ကြီးကြီးကျယ်ကျယ် ဒဏ်ရာရနိုင်ချေကိုလည်း လျှော့ချပေးပါတယ်။

ဒီလေ့ကျင့်ခန်း ခြောက်ခုထဲက သင်ကြိုက်နှစ်သက်ရာ လေ့ကျင့်ခန်းကို ပုံမှန်လုပ်ပေးဖို့ တိုက်တွန်းလိုပါတယ်။ ဒီနေရာအထိ ဖတ်ပေးတဲ့ MyStyle Myanmar ပရိတ်သတ်တွေအားလုံး သက်တော်ရာကျော်ရှည်ကြပါစေ။

Source: Brightside.me

By MyStyle Myanmar