အားလုံးပဲ မင်္ဂလာပါနော်။ ခန္ဓာကိုယ် မဝပေမယ့် ဗိုက်နဲ့ခါးမှာ အဆီစုပြီး ဗိုက်ပူ၊ ဗိုက်ခေါက်ထွက်လွယ်လို့ စိတ်ညစ်နေတဲ့သူတွေရှိလား။ ဒီလိုခါးအဆီရှိသူတွေအတွက် ဒီတစ်ခေါက်မှာ နှစ်ပတ်လောက်အချိန်ပေးပြီး ပုံမှန်လုပ်ရုံနဲ့ ဗိုက်ချပ်လာအောင် ကူညီပေးမယ့် ယောဂလေ့ကျင့်ခန်းတွေအကြောင်းကို ဖော်ပြပေးလိုက်ပါတယ်။ လုပ်ရလွယ်တဲ့ အခြေခံယောဂ Pose လေးတွေ ပါဝင်တာမို့ အခုမှစလုပ်မယ့်သူတွေ၊ Cardio လိုခုန်ပေါက်ရတဲ့ လေ့ကျင့်ခန်းမျိုး မလုပ်ချင်သူတွေအတွက် အဆင်ပြေစေမှာပါ။
(၁) Cobra Pose
ဗိုက်ကြွက်သားကို တင်းထားပြီး ပြုလုပ်ပေးရမယ့် ယောဂ Pose ဖြစ်ပါတယ်။ မှောက်လျက်အနေအထားနဲ့ ခြေထောက်နှစ်ဖက် နောက်ဘက်ဆန့်ထုတ်ကာ ခန္ဓာကိုယ်အပေါ်ပိုင်းကို လက်နဲ့ထောက်ထားပြီး တတ်နိုင်သလောက် ကော့ပေးရမှာပါ။ လက်ကို ဆန့်ဆန့်ထောက်ထားပြီး စက္ကန့် ၃၀ လောက် တောင့်ခံထားပေးပါ။ အချိန်ပြည့်တဲ့အခါ အသက်ဖြေးဖြေးမှန်မှန် ရှုထုတ်ပြီး ၁၅ စက္ကန့်လောက်နားကာ နောက်ထပ် စက္ကန့် ၃၀ စီ လေး၊ ငါးကြော့လောက်ပြုလုပ်ပေးနိုင်ပါတယ်။
(၂) Bow Pose
Bow Pose က ခါးတစ်ဝိုက် ကြွက်သားတင်းရင်းပြီး ခန္ဓာကိုယ်ပျော့ပြောင်းစေဖို့ ကူညီပေးနိုင်ပါတယ်။ ပုံပါအတိုင်း ဗိုက်ကိုဖိကာ မှောက်ထားပြီး ဒူးကွေးပေးပါ။ လက်နောက်ပြန်ထားပြီး ကွေးထားတဲ့ ခြေထောက်နှစ်ဖက်ကို ခပ်တင်းတင်း ဆွဲကိုင်ပေးရမှာဖြစ်ပါတယ်။ ဒီပုံအတိုင်း ၁၅ စက္ကန့်ကနေ စက္ကန့် ၃၀ အထိ ထိန်းထားပေးပါ။ ဒီယောဂ Pose ကိုလည်း ကြားထဲမှာ ၁၅ စက္ကန့်လောက်နားပြီး လေးကြော့ခန့် လုပ်ပေးဖို့လိုပါတယ်။
(၃) Boat Pose
ပုံမှာပြထားတဲ့ Boat Pose အတိုင်း တစ်ကြိမ်မှာ စက္ကန့် ၃၀ နဲ့ လေးကြော့လောက်လုပ်ပေးရပါမယ်။ လက်တွေကို ခြေထောက်နားရောက်နိုင်သလောက် ဆန့်ထုတ်ပေးပါ။ ဗိုက်ကြွက်သားကို အားပြုပြီး လုပ်ပေးရမယ့်လေ့ကျင့်ခန်းဖြစ်တာမို့ ခါးတစ်ဝိုက်အဆီတွေ ထိထိရောက်ရောက်လောင်ကျွမ်းဖို့ ကူညီပေးပါလိမ့်မယ်။
(၄) Wind Relieving Pose
Photo Source: classic 105
ဒီ Pose အတွက် ခန္ဓာကိုယ်လှဲချပြီး ဒူးကွေးကာ ဒူးနှစ်ဖက်လုံးကို လက်နဲ့ ချိတ်ထားရမှာပါ။ ပြီးနောက် ကွေးထားတဲ့ဒူးတွေကို သင့်နဖူးနဲ့ တတ်နိုင်သလောက် ထိပေးရပါမယ်။ ကိုယ်ထိန်းနိုင်သလောက် စက္ကန့် ၃၀ ကနေ ၆၀ အထိ တောင့်ထားပေးပါ။ ခန္ဓာကိုယ်ပျော့ပြောင်းပြီး ခန္ဓာကိုယ်အောက်ပိုင်း အကြောပြေလျော့စေပါလိမ့်မယ်။
(၅) Plank Pose
တော်တော်များများလုပ်လေ့ရှိတဲ့ Plank ထောက်လေ့ကျင့်ခန်းကလည်း ဗိုက်ချပ်ပြီး ဝိတ်ကျဖို့အတွက် အရမ်းအသုံးဝင်ပါတယ်။ ခန္ဓာကိုယ်တစ်တန်းတည်းဖြစ်အောင် တောင့်ထားကာ ကိုယ်နိုင်သလောက် Plank ထာက်ပေးပါ။ အခုမှ စထောက်မယ့်သူတွေအနေနဲ့ စက္ကန့် ၂၀ မှ ၃၀ ကြား ထောက်နိုင်ပြီး အကျင့်ရသွားတဲ့အခါ တစ်မိနစ်လောက် တိုးပြီး ပုံမှန်ထောက်ပေးပါ။
Photo Source: Pinterest
By MyStyle Myanmar
