မင်္ဂလာပါနော်။ ခန္ဓာကိုယ်ပိန်ပိန်၀၀ အသက်အရွယ်ရလာရင် လက်မောင်းသားတွေတွဲကျလာတတ်တာမို့ ပုံမှန်လေ့ကျင့်ခန်းလေးလုပ်ပေးတာ မမှားပါဘူး။ လက်မောင်းအတွက်ထိရောက်တဲ့ ယောဂလေ့ကျင့်ခန်းတွေ လုပ်ပေးတာက ရေရှည်မှာ လက်မောင်းကြွက်သားတွေတင်းရင်းပြီး ကျစ်လျစ်လာစေမှာပါ။ ဒါ့အပြင် လက်ပြင်ကုန်းသလိုဖြစ်နေတဲ့သူတွေအတွက် လက်မောင်းနဲ့ပုခုံးအနေအထားကိုပါ အချိုးကျစေမှာဖြစ်လို့ ဒီတစ်ခေါက်မှာ လက်မောင်းကြွက်သားအတွက်ထိရောက်စေမယ့် ယောဂလေ့ကျင့်ခန်းအချို့ကို ဖော်ပြပေးလိုက်ပါတယ်။
၁။ High Plank Pose
Plank ထောက်တဲ့ပုံစံကိုမှ တံတောင်နဲ့မထောက်ပဲ ကြမ်းပြင်ကို လက်ဖဝါးနဲ့ထိကာ ထောက်ပေးရမှာပါ။ လက်နှစ်ဖက်လုံး အားပြုပြီး ခါးဆန့်ကာ ခြေဖျားထောက်ထားပေးပါ။ ဒီယောဂ Pose အတိုင်း အနည်းဆုံး ၁၀ စက္ကန့်ကနေ ၃၀ စက္ကန့်အထိ ထောက်ထားနိုင်ပါတယ်။
၂။ Crow Pose
ပုံထဲကလို ဒူးတွေကိုစုပြီး လက်ထောက်ကာ ခန္ဓာကိုယ်အောက်ပိုင်းကို ဖြေးဖြေးချင်း မ ပေးပါ။ ဒူးကွေးတဲ့နေရာနဲ့ လက်မောင်းနောက်ပိုင်းကို ထိပြီး ထိန်းထားရပါမယ်။ ဒီ Pose က အခုမှစလုပ်မယ့်သူတွေအတွက် ဟန်ချက်ညီအောင်ထိန်းဖို့ ခက်ခဲနေနိုင်တာမို့ တစ်နေ့နည်းနည်းချင်း လေ့ကျင့်ပြီး လုပ်ပေးပါ။
၃။ Downward Facing Pose
ခန္ဓာကိုယ်အပေါ်ပိုင်းကို V ဇောက်ထိုးပုံစံရှေ့ကိုကွေးကာ လက်တွေအားပြုပြီး ထောက်ပေးပါ။ ဒူးမကွေးစေဘဲ ခြေထောက်ဆန့်ထားပြီး ခေါင်းကိုကြမ်းပြင်နားရောက်တဲ့အထိ ငုံ့ထားရပါမယ်။ ခန္ဓာကိုယ်တစ်ခုလုံးရဲ့ တင်းနေတဲ့အကြောတွေပြေလျော့စေတဲ့အပြင် လက်မောင်းကိုပါ ကျစ်လျစ်လာစေပါတယ်။ ဒီပုံစံအတိုင်း စက္ကန့် ၃၀ လောက်နေပြီး နေ့တိုင်းလုပ်ပေးပါ။
၄။ Dolphin Pose
ခန္ဓာကိုယ်ဝိတ်ကိုပါ ကျစေတဲ့ ယောဂတစ်မျိုးဖြစ်ပါတယ်။ အပေါ်ကလို ခန္ဓာကိုယ် V ဇောက်ထိုးပုံစံ ကုန်းပြီး တံတောင်ကိုအားပြုကာ ထောက်ပေးပါ။ ဒူးမကွေးအောင်အားပြုပြီး စက္ကန့် ၃၀ လောက် ထောက်ပေးဖို့လိုပါတယ်။
၅။ Low Push-Up
ခြေဖျားထောက်ပြီး လက်တွေကိုအားပြုကာ ပုံထဲကလို ဒိုက်ထိုးတဲ့အနေအထား ထောင့်ထားပေးပါ။ ခန္ဓာကိုယ်တစ်ဖြောင့်တည်း တန်းနေအောင်ထားပြီး လက်မောင်းကြွက်သားနေရာတွေအပေါ်အာရုံစိုက်ထားဖို့ လိုပါတယ်။ ဒိုက်မထိုးတတ်တဲ့သူတွေအတွက် ခက်ခဲနိုင်တာမို့ ဒါကိုလည်း ဖြေးဖြေးချင်းလေ့ကျင့်ပြီး ၁၀ စက္ကန့်ကနေ စက္ကန့် ၃၀ လောက်ထိ တိုးလုပ်သွားဖို့လိုပါတယ်။
Photo Source: Pinterest, healthshots.com
By MyStyle Myanmar
