မင်္ဂလာပါ။ ပုံမှန်လေ့ကျင့်ခန်းတွေက အမှန်တကယ်ကိုယ်ရည်စစ်ပြီး ဝိတ်ကျဖို့ မဖြစ်မနေအကျင့်လုပ်ရမယ့် အရာတစ်ခုပါနော်။ ဒါပေမယ့် သင်က လေ့ကျင့်ခန်းလုပ်ဖို့ကို သီးသန့်အချိန်မပေးနိုင်တာ၊ လုပ်ကျင့်မရှိတာ စတဲ့ အကြောင်းအမျိုးမျိုးပြရင်း ရက်ရွှေ့နေမိတဲ့သူဆိုရင် အခုဆောင်းပါးမှာ ဖော်ပြပေးမယ့် အချိန်နည်းနည်းနဲ့ ထိရောက်တဲ့ လေ့ကျင့်ခန်းတွေကို လုပ်ကြည့်ဖို့ တိုက်တွန်းချင်ပါတယ်။ ဒီတစ်ခေါက်မှာ တစ်နေ့ ၁၀ မိနစ်လောက်အချိန်ပေးပြီး လုပ်သွားရုံနဲ့ ထိထိရောက်ရောက် ဝိတ်ကျစေမယ့် လေ့ကျင့်ခန်းတွေကို ဖော်ပြပေးလိုက်ပါတယ်။
Jumping Jacks
လက်နဲ့ခြေထောက်တွေကားပြီး ခုန်ပေးရတဲ့ ဒီလေ့ကျင့်ခန်းက တစ်ကိုယ်လုံးအားပြုပြီး လုပ်ရတာမို့ ကယ်လိုရီများများ လောင်ကျွမ်းစေပါတယ်။ စက်ကိရိယာတွေမလိုဘဲ အချိန်မရွေးလုပ်နိုင်တာမို့ အားလုံးအတွက် အဆင်ပြေမှာပါ။ ထိရောက်ဖို့အတွက် ဒီလေ့ကျင့်ခန်းကို တစ်မိနစ်လုပ်ပြီး ၁၅ စက္ကန့်နားတဲ့ပုံစံနဲ့ သုံးကြော့လောက်လုပ်သင့်ပါတယ်။
Squats
Squat ထိုင်တာကလည်း အချိန်နည်းနည်းနဲ့ ခန္ဓာကိုယ်အောက်ပိုင်းအဆီကျဖို့ အရမ်းထိရောက်ပါတယ်။ ဒါပေမယ့် ထိုင်နေကျမဟုတ်ရင်တော့ အနေအထားမှားတတ်တာမို့ တဖြည်းဖြည်းလေ့ကျင့်ရင်း လုပ်သွားပေးပါ။ ထိုင်ချတဲ့အခါ ကျောမကုန်းသွားအောင် သတိထားရပါမယ်။ သူ့ကိုလည်း ပုံစံမှန်မှန်နဲ့ တစ်မိနစ်လောက်ထိုင်လိုက် ၁၅ စက္ကန့် နားလိုက်နဲ့ သုံးကြာ့လောက် လုပ်ပေးသင့်ပါတယ်။
Push Ups
လက်မောင်းကြွက်သားတွေ အားပြုပြီးလုပ်ပေးရတဲ့ ဒိုက်ထိုးလေ့ကျင့်ခန်းက လုပ်နိုင်လေလေ ခန္ဓာကိုယ်အပေါ်ပိုင်းကျစ်လျစ်ပြီး ကိုယ်တွင်းအဆီကျလေပါပဲနော်။ ဒါကြောင့်မို့ ဒီ ၁၀ မိနစ်အတွင်းမှာ ဒိုက်ထိုးလေ့ကျင့်ခန်းကို ကိုယ်လုပ်နိုင်သလောက် ၁၅ မှ ၃၀ စက္ကန့်အထိ ဟန်ချက်ထိန်းပြီးလုပ်ပေးပါ။
Plank
အဆီကျဖို့အတွက် Plank ထောက်တာကလည်း မပါမဖြစ်ပါပဲ။ ဝမ်းဗိုက်အဆီကျပြီး ကယ်လိုရီတွေပါ လောင်ကျွမ်းစေတာမို့ သူ့ကိုလည်း လုပ်နိုင်သလောက် ၁ မိနစ်ထိ အနေအထားမှန်မှန်နဲ့ ထောက်ပေးပါ။
Burpees
ဒီလေ့ကျင့်ခန်းက လုပ်ရခက်ပေမယ့် တစ်ကိုယ်လုံး ကယ်လိုရီများများကျဖို့ ကူညီပေးပါတယ်။ ပုံထဲကလို လက်ထောက်ကာ ဒိုက်ထိုးတဲ့ အနေအထားမှောက်လိုက် အမြန်ပြန်ထလိုက် လုပ်ပေးရမှာပါ။ ပြန်ထတဲ့အခါ လက်မြှောက်ပြီး ခုန်ပေးရင် ပိုကောင်းပါတယ်။ သူ့ကိုတော့ အကြိမ် ၂၀ နဲ့ နှစ်ကြော့ခန့် လုပ်ပေးသင့်ပါတယ်။
Photo Source: Pinterest
By MyStyle Myanmar
