ခေါင်းလျှော်တဲ့အခါမှာ Conditioner သုံးပေးတာ Hair Mask သုံးပေးတာက ဆံသားအတွက် ပိုကောင်းပါတယ်။ ဆံသားပျက်စီးတာတွေ သက်သာစေတဲ့အပြင် ဆံသားလည်းပိုကောင်းလာပြီး Healthy Hair ရလာစေပါတယ်။ ဒါပေမယ့် သုံးနည်းမှားတာ၊ မလုပ်သင့်တာတွေ လုပ်မိတာမျိုးဆိုရင်တော့ ဆံသားထိခိုက်ပျက်စီးတာမျိုး ဖြစ်တတ်ပါတယ်။ ဒါကြောင့် သတိထားဆင်ခြင်လို့ရအောင် Hair Mask သုံးတဲ့အခါမှာ မလုပ်သင့်တဲ့အရာ ၅ ခုကို ပြောပြပေးလိုက်ပါတယ်။
ခြောက်သွေ့နေတဲ့ဆံသားမှာတန်းမသုံးပါနဲ့
ခေါင်းကိုရေမစွတ်ပဲနဲ့ Hair Mask တန်းသုံးတာမျိုး မလုပ်ရပါဘူး။ ဆံသားပျက်စီးတာ၊ ကျွတ်တာတွေ ဖြစ်စေပါတယ်။ ဆံပင်နဲ့ဦးရေပြားမှာရှိတဲ့ အညစ်အကြေးတွေကို သေချာပြောင်အောင် လျှော်ပြီးတော့မှသာ Hair Mask သုံးပေးတာကတော့ အကောင်းဆုံးပါပဲ။
အရည်အသွေးနိမ့်တာတွေမသုံးပါနဲ့
ဈေးကြီးမှကောင်းတာမျိုးတော့ မဟုတ်ပါဘူး။ ဈေးသက်သာပြီးကောင်းတဲ့ Hair Mask တွေလည်း ရှိပါတယ်။ အဓိကတော့ အရည်အသွေးနိမ့်တဲ့ Hair Mask တွေကို မသုံးဖို့ပါပဲ။ အရည်အသွေးနိမ့်တဲ့ Hair Mask တွေက ဆံသားပိုကောင်းမလာတဲ့အပြင် ဆံပင်ကျွတ်တာ၊ ဗောက်ထတာ၊ ဦးရေပြားထိခိုက်တာတွေ ဖြစ်နိုင်ပါတယ်။
အများကြီးယူသုံးတာမျိုးမလုပ်ပါနဲ့
Hair Mask သုံးတဲ့အခါမှာပဲဖြစ်ဖြစ် Conditioner သုံးတဲ့အခါမှာပဲဖြစ်ဖြစ် သင့်တော်တဲ့ပမာဏလောက်ပဲ ယူသုံးပါ။ အများကြီးယူသုံးရင် ခေါင်းလျှော်ပြီးလည်း ဆံပင်ကစေးပြီး အဆီပြန်နေသလိုမျိုး ဖြစ်စေပါတယ်။ ဒါ့အပြင် အများကြီးယူသုံးပြီး ပြောင်အောင်မလျှော်နိုင်ရင်လည်း ဗောက်ထတာ၊ ယားယံတာတွေ ဖြစ်စေပါသေးတယ်။
အချိန်အကြာကြီးမထားပါနဲ့
Hair Mask သုံးတဲ့အခါ ၁၀ မိနစ်၊ ၁၅ မိနစ်ထပ် ပိုမထားပါနဲ့။ အကြာကြီးထားရင်လည်း အပေါ်မှာပြောခဲ့သလိုပဲ ဆံပင်ကစေးပြီး အဆီပြန်နေသလိုမျိုး ဖြစ်သွားပါတယ်။ ဒီတော့ ခေါင်းလျှော်ပြီးလည်း ဆံပင်ကကပ်ကပ်ကြီးဖြစ်ပြီး မလှတော့ဘူးပေါ့။
ဦးရေပြားကိုမထိပါစေနဲ့
Hair Mask နဲ့ Conditioner တွေသုံးတဲ့အခါမှာ ဦးရေပြားနဲ့ခွာပြီး ဆံသားကိုပဲ သုံးပေးပါ။ ဦးရေပြားကိုထိတာ၊ ပွတ်တာတွေလုပ်ရင် ပြောင်အောင်မလျှော်တဲ့အခါမှာ ဗောက်ထတာ၊ ဦးရေပြားယားယံတာ၊ ဆံပင်ကျွတ်တာတွေ ဖြစ်စေပါတယ်။ ဒါ့အပြင် ခေါင်းလျှော်ပြီးလည်း ဆံပင်စေးပြီးအဆီပြန်သလို ဖြစ်စေပါတယ်။
