လူတွေရဲ့ ကိုယ်ခန္ဓာဟာ ငယ်တုန်းရွယ်တုန်းမှာ အကြောအချဉ်တွေ ညွှတ်ရပြောင်းရ လွယ်တဲ့သဘောရှိပြီး အရွယ်ရလာတာနဲ့အမျှ အကြောတွေ ဆိုင်းလာတာ ၊ အဆစ်အမြစ်တွေက လှုပ်ရှားရခက်လာတာမျိုး ရှိလာပါတယ်။ အထူးသဖြင့် ရုံးအလုပ် အလုပ်များတဲ့သူတွေလို အထိုင်သမားတွေက အခြေအနေပိုဆိုးနိုင်ပါတယ်။ ဒီတော့ သင့်ခန္ဓာကိုယ်ရဲ့ ကွေးညွှတ်နိုင်စွမ်းကို စမ်းသပ်ကြည့်ဖို့ နဲ့ သင့်ရဲ့ အရွယ်အုပ်စုကို မှန်းဆနိုင်ဖို့ ဒီလေ့ကျင့်ခန်း ၅ ခု လုပ်ကြည့်ရအောင်ပါ။
(၁) ပုခုံးဆစ် လေ့ကျင့်ခန်း
လက်နှစ်ဖက်ကို ကျောဘက်မှာ လက်အုပ်ချီတဲ့ပုံစံလုပ်ကြည့်ပါ။ တချို့လူတွေ ဒီလေ့ကျင့်ခန်းလုပ်ဖို့ အတော်လေး ခက်ခဲတာတွေ့ရပါမယ်။ ဒါက လက်မောင်း ၊ ပုခုံးအကြောအချဉ်တွေ ဖြေလျှော့တဲ့ လေ့ကျင့်ခန်းမျိုး လုပ်ဖို့ လိုနေတာကို ပြနေတာ ဖြစ်ပါတယ်။ လက်နောက်ပြန် လှည့်ပြီး လက်အုပ်ချီလေ့ကျင့်တဲ့ လေ့ကျင့်ခန်း လုပ်ရတာ လွယ်ရင်တော့ ပုခုံးကျန်းမာရေးကောင်းပြီး နုပျိုသွက်လက်နေဆဲလို့ ဆိုရမှာပါ။
(၂) ကျောရိုးဆစ် လေ့ကျင့်ခန်း
ခြေစုရပ်ပြီး မတ်မတ်ရပ်နေရာကနေ လက်ဖဝါးနှစ်ဖက်ကို ကြမ်းပြင်နဲ့ထိအောင် ကုန်းချလိုက်တာ ဖြစ်ပါတယ်။ ခါးကို ညွှတ်ချရာမှာ ဒူးမကွေးဘဲ ပေါင်နှစ်ဖက်စလုံး တစ်ဖြောင့်တည်း ထားပြီး လက်ကို ကြမ်းနဲ့ ထိအောင် လုပ်နိုင်ရင် အသက် ၂၅ ထက် မကျော်သေးတဲ့သူ ပုံမှန် အကြောဖြေလျှော့နိုင်တဲ့သူလို့ သတ်မှတ်ထားတာပါ။ လက်ချောင်းနဲ့ ထိရုံလေးပဲတင်ဆိုရင် အဆင်တော့ပြေတယ်။ ထပ်တော့ လေ့ကျင့်ဖို့ လိုပါတယ်။
(၃) လည်ပင်း ၊ ပုခုံး လေ့ကျင့်ခန်း
ဒီလေ့ကျင့်ခန်းပုံစံက ဒူးထောက် ခါးမတ်ထားပြီး လက်နှစ်ဖက်နဲ့ ခါးကို ထောက်ပြီး အနောက်ကို လှန်ချကြည့်ပါ။ သတိတော့ ထားပြီး လှန်ကြည့်ပါ။ အကောင်းဆုံးက ဖနောင့်ကို လက်ချောင်းတွေနဲ့ လှမ်းထိနိုင်တဲ့ အနေအထား ဖြစ်ပါတယ်။ မရသေးရင်တော့ အကြောလျှော့တဲ့အလေ့အကျင့်လေး ထပ်လုပ်ပေးဖို့ လိုပါလိမ့်မယ်။
(၄) တင်ပါးဆစ် လေ့ကျင့်ခန်း
ယောဂဖျာပေါ်မှာ ငုတ်တုပ်ထိုင် ခြေတစ်ဖက်ကွေး ၊ ခြေတစ်ဖက်ဆန့်ထားပြီး လက်နှစ်ဖက်နဲ့ ခြေထိပ်ကို ဆွဲကာ ခေါင်းနဲ့ဒူး ကပ်ထားဖို့ ဖြစ်ပါတယ်။ ထိလျက်သားနဲ့ အနည်းဆုံး ၂ မိနစ်နေနိုင်ရင် သင့်ရဲ့ ရုပ်ပိုင်းဆိုင်ရာအသက်အရွယ်ဟာ ကလေးတစ်ယောက်လို ပျော့ပြောင်းနေပါတယ်။ ခေါင်းနဲ့ ဒူးမထိနိုင်ရင် လေ့ကျင့်ခန်းဆက်လုပ်ပေးဖို့ တိုက်တွန်းချင်ပါတယ်။
(၅) ဒူးဆစ်လေ့ကျင့်ခန်း
အရင်ဆုံး ဒိုက်ထိုးသလို လက်နှစ်ဖက်နဲ့ လေးဘက်ထောက်ထားပြီး နေတဲ့ အနေအထားကနေ တြိဂံပုံစံ (A) အက္ခရာအနေအထား နေဖို့ပါ။ အသက် ၃၀ ကျော်လာရင် ဒူး ၊ တံတောင်နဲ့ ကျောဘက်တွေက အကြောအဆစ်တွေက တင်းတောင့်နေပြီး ကွေးညွှတ်ပျော့ပြောင်းရခက်ပါတယ်။ အခုပြောတဲ့ လေ့ကျင့်ခန်းကို လုပ်လို့ မရဘူးဆိုရင် အားကစားလုံးဝ မလုပ်တဲ့သူလို့တောင် ဆိုနိုင်ပါတယ်။
Source: BrightSide
