မင်္ဂလာပါ ပျိုမေတို့ရေ။ ပျိုမေတို့ရဲ့ အသားအရေအတွက် သဘာဝပစ္စည်းတွေနဲ့ ပေါင်းတင်တာက အကုန်အကျသက်သာသလို Chemical မပါတာမို့ အရေပြားအတွက် ဘေးထွက်ဆိုးကျိုးလည်း နည်းပါတယ်နော်။ Skincare ပစ္စည်းတွေက အနည်းနဲ့အများ Chemical ပါပြီးသားမို့ အသုံးများရင် အသားပါးလာတာမျိုး ကြုံရမှာပါ။ ဒါကြောင့် ဒီတစ်ခေါက်မှာတော့ ပျိုမေတို့အတွက် အကုန်အကျလည်းနည်းပြီး အသားအရေအတွက် အမှန်တကယ်အကျိုးပြုတဲ့ သဘာဝအသီး၊ အဆီအနှစ်တွေနဲ့ ပေါင်းတင်တာကြောင့် ရနိုင်တဲ့ အကျိုးကျေးဇူးတွေကို ဖော်ပြပေးချင်ပါတယ်။
အသားအရေအတွက် Safe ဖြစ်တယ်
သဘာဝပစ္စည်းတွေမှာ အဆိပ်အတောက်မပါတာမို့ အသားအရေကို မထိခိုက်နိုင်ပါဘူး။ သဘာဝအဆီအနှစ်တွေနဲ့ ပေါင်းတင်တာက အစိုဓာတ်ဖြည့်ပြီး အရေပြားတွင်းဆဲလ်လည်ပတ်မှုကောင်းတာမို့ အသားအရေကို တင်းတင်းအိအိလေးဖြစ်စေမှာပါ။
အာဟာရဖြည့်ပြီးသားဖြစ်တယ်
ကျန်းမာရေးအတွက် အာဟာရပြည့်တဲ့အစားအသောက်တွေက အရေးပါသလို အသားအရေအတွက်လည်း အလားတူပါပဲ။ သဘာဝပစ္စည်းတွေမှာ ဗီတာမင်နဲ့ Antioxidant စတဲ့ အာဟာရတွေပါဝင်တာမို့ ပျက်စီးနေတဲ့အသားအရေကို အချိန်တိုအတွင်းပြန်လည်သက်သာစေမှာပါ။
ပတ်ဝန်းကျင်အတွက်လည်း သင့်တော်တယ်
အလှအပထုတ်ကုန်တွေမှာသုံးတဲ့ ဓာတုပစ္စည်းလက်ကျန်တွေက ပတ်ဝန်းကျင်ကျန်းမာရေးနဲ့ သန့်ရှင်းမှုစတာတွေကို အနည်းနဲ့အများ ထိခိုက်စေတာမို့ သဘာဝအတိုင်းရတဲ့ပစ္စည်းတွေကသာ အကောင်းဆုံးပါပဲ။
အာနိသင်စိမ့်ဝင်မှုပိုကောင်းတယ်
အရောအနှောမရှိတဲ့ သဘာဝပစ္စည်းတွေက အရေပြားတွင်း အာနိသင်စိမ့်ဝင်မှုအား ပိုကောင်းပါတယ်နော်။ သင့်အနေနဲ့ သဘာဝအတိုင်းလုပ်လို့ရတဲ့နည်းတွေနဲ့ ပေါင်းတင်လိုက်ပေးတာက အသားအရေအတွက် ဘေးထွက်ဆိုးကျိုးမရှိဘဲ သိသာတဲ့ရလဒ်ကို အချိန်တိုအတွင်းရစေမှာပါ။
မတူတဲ့အာနိသင်တွေရှိတယ်
သဘာဝပစ္စည်းတွေမှာ ပါဝင်တဲ့ဗီတာမင်ဓာတ်တွေပေါ်မူတည်ပြီး အသားအရေအတွက် ရနိုင်တဲ့ အာနိသင်တွေလည်း မျိုးစုံရှိတတ်ပါတယ်။ ဥပမာအနေနဲ့ Antioxident ပါဝင်မှုများတဲ့ပစ္စည်းတွေဟာ အရေပြားပေါ်က ချွေးပေါက်တွေကို ပိုသန့်စင်ပေးနိုင်ပြီး ဗီတာမင်ပိုများတဲ့ သဘာဝပစ္စည်းတွေကတော့ နေလောင်ဒဏ်ကာကွယ်ကာ အသားအရေတင်းရင်းစေတဲ့ အာနိသင်ပိုများပါတယ်။
Photo Source: Pinterest
By MyStyle Myanmar
