မင်္ဂလာပါနော်။ သင်က အိမ်မှာပဲ လေ့ကျင့်ခန်းလုပ်ချင်ပေမယ့် အထပ်မြင့်မှာနေတာမို့ ဆူဆူညံညံခုန်နေလို့ အဆင်မပြေတဲ့သူလား။ ဒါဆိုရင်တော့ ဒီဆောင်းပါးက သင့်အတွက်အသုံးဝင်မှာပါ။ ဒီတစ်ခေါက်မှာ သင့်အနေနဲ့ ခုန်ရတဲ့လေ့ကျင့်ခန်းတွေလုပ်ရတာ မကြိုက်လို့ပဲဖြစ်ဖြစ်၊ အသံမဆူချင်တာကြောင့်ပဲဖြစ်ဖြစ် ရွေးချယ်နိုင်မယ့် အဆီကျလေ့ကျင့်ခန်း (၅) မျိုးကို ဖော်ပြပေးလိုက်ပါတယ်။ တစ်ကိုယ်လုံးအဆီလောင်ကျွမ်းစေမယ့်အပြင် ၁၀ မိနစ်လောက်အချိန်ပေးပြီးလုပ်ရုံပဲမို့ စိတ်ဝင်စားတယ်ဆိုရင် လိုက်လုပ်ကြည့်ဖို့ မမေ့ပါနဲ့နော်-
Ice Skater
ပေါင်အဆီကျစေတဲ့လေ့ကျင့်ခန်းဖြစ်ပါတယ်။ ပုံမှာပြထားတဲ့အတိုင်း ခြေထောက်တစ်ဖက် ဒူးကွေးပြီး ကျန်တစ်ဖက်ကိုနောက်ပြစ်ကာ တစ်ဖက်ချင်းပြောင်းပြီး ရှေ့တိုးနောက်ဆုတ်လုပ်ပါ။ ခန္ဓာကိုယ်အပေါ်ပိုင်းကို ကုန်းကာ လက်တစ်ဖက်ကို ရှေ့ထုတ်လိုက်တဲ့ခြေထောက်ထိပ်နဲ့လှမ်းထိပေးရပါမယ်။ ဒီအတိုင်း စက္ကန့် ၃၀ မှ ၄၀ ကြားလုပ်ပေးပါ။
Lunge Kicks
ဒူးတစ်ဖက်ကို ကြမ်းပြင်နဲ့မထိခင်လေး ၉၀ ဒီဂရီကွေးကာ ပြန်ထပြီး ရှေ့ကိုကန်ထုတ်လိုက်ပါ။ နောက်တစ်ဖက်ကိုလည်း ဒီအတိုင်းပြောင်းလုပ်ပေးရပါမယ်။ ခန္ဓာကိုယ်ဟန်ချက်ထိန်းနိုင်ဖို့ အရေးကြီးပါတယ်။ ဒီလေ့ကျင့်ခန်းကိုလည်း ဖြေးဖြေးချင်းကျင့်ပြီး တစ်ဖက် ၄၀ စက္ကန့်စီထိရအောင် လုပ်ပေးပါ။
Standing Cross Crunches
ခါးဘေးအဆီတွေအတွက်ထိရောက်တဲ့လေ့ကျင့်ခန်းပါ။ ပုံထဲကလို လက်နှစ်ဖက်ခေါင်းနောက်မှာထားကာ ဒူးထောင်ပြီး ဆန့်ကျင်ဘက်တံတောင်နဲ့ လှမ်းထိပေးပါ။ သူ့ကိုလည်း တစ်ဖက်ချင်းပြောင်းပြီး စက္ကန့် ၄၀ ပြုလုပ်ဖို့လိုပါတယ်။
Squat Punches
Squat ထိုင်ရင်း ပုံထဲကလို ဘေးနှစ်ဖက်ကို လက်သီးနဲ့ထိုးတဲ့ပုံစံလုပ်ပေးပါ။ ဒီပုံအတိုင်း စက္ကန့် ၄၀ လောက် ထပ်ခါထပ်ခါ လုပ်ပေးရပါမယ်။ Squat က လုပ်နေကျမဟုတ်ရင် ထိုင်တဲ့ပုံစံမှားနိုင်တာမို့ အနေအထားမှန်အောင် လေ့ကျင့်ရင်းလုပ်သွားဖို့လိုပါတယ်။
Plank Mountain Climbers
Plank အနေအထားအတိုင်း တံတောင်ထောက်လျက်အနေအထားနဲ့ ခြေထောက်တွေကို တောင်တက်တဲ့ပုံစံ ရှေ့တိုးနောက်ဆုတ်လုပ်ပေးပါ။ သူ့ကိုလည်း တံတောင်နဲ့ဟန်ချက်ထိန်းထားပြီး စက္ကန့် ၄၀ လောက်ရအောင် လုပ်ပေးသင့်ပါတယ်။
Photo Source: Pinterest
By MyStyle Myanmar
