မင်္ဂလာပါနော်။ ခန္ဓာကိုယ်ကမဝဘဲ လက်မောင်းအဆီတွေရှိနေတာ၊ ပုံမှန်ထက် လက်မောင်းတုတ်နေတာက လက်ပြတ်အင်္ကျီတွေဝတ်ရတာ အဆင်မပြေသလို ဓာတ်ပုံရိုက်လိုက်တိုင်းမှာလည်း လက်မောင်းကွက်ကြီးနေသလိုမြင်ရပြီး သင့်ကို စိတ်အနှောက်အယှက်ဖြစ်စေမှာပါ။ ဒါကြောင့် ဒီတစ်ခေါက်မှာ လက်မောင်းအဆီကျကာ ကျစ်လျစ်စေမယ့်အပြင် လက်ပြင်ကုန်းပြီးအနေအထားမမှန်တာကိုပါ ပြုပြင်နိုင်မယ့် ၄ မိနစ်စာ လက်မောင်းလေ့ကျင့်ခန်းတွေအကြောင်းကို မျှဝေပေးလိုက်ပါတယ်။ တစ်နေ့ နှစ်ကြော့ခန့် ပြုလုပ်ပေးရုံနဲ့ နှစ်ပတ်လောက်အတွင်းသိသာတဲ့ရလဒ်ကိုရစေမှာပါ။
လုပ်ရမယ့်ပုံစံတွေကတော့-
လေ့ကျင့်ခန်း ၁
ပထမဆုံး ဒူးထောက်ကာ လက်နှစ်ဖက်ကိုဘေးဘက်မှာ မြှောက်ထားပြီး လက်မောင်းကို နောက်ပြန် စက်ဝိုင်းဆွဲသလို လှည့်ပေးရမှာပါ။ စက္ကန့် ၃၀ ခန့်လှည့်ပေးပြီးနောက် သူနဲ့ဆန့်ကျင်ဘက် အရှေ့စက်ဝိုင်းပုံစံ ပြန်လှည့်ပေးရမှာဖြစ်ပါတယ်။ ဒါကိုလည်း စက္ကန့် ၃၀ လှည့်ပြီး ပြုလုပ်ပေးပါ။
လေ့ကျင့်ခန်း ၂
ပုံထဲကလို လက်တွေကို နောက်ပို့ပြီး ၉၀ ဒီဂရီပုံစံ ကွေးပေးပါ။ ပြီးနောက် လက်နှစ်ဖက်လုံးကို ရှေ့တိုးနောက်ဆုတ် ခတ်ပေးရမှာဖြစ်ပါတယ်။ တဖြည်းဖြည်းနဲ့ လက်မောင်းကြွက်သားတွေတင်းလာတာကို ခံစားရမှာဖြစ်ပြီး စက္ကန့် ၃၀ လောက်တောင့်ထားပြီး ပြုလုပ်ပေးရပါမယ်။
လေ့ကျင့်ခန်း ၃
လက်ကို ၉၀ ဒီဂရီအနေအထားမပျက်စေဘဲ လက်ဖဝါးတွေကို မျက်နှာချင်းဆိုင်ပြီး ဖြေးဖြေးချင်း လက်ခုပ်တီးတဲ့ပုံစံလုပ်ပေးရပါမယ်။ ပြုလုပ်နေစဉ်မှာ ခန္ဓာကိုယ်ကိုအရမ်းမတင်းထားဘဲ ပုခုံးကြောတွေကိုလျှော့ထားပေးပါ။ ဒါကိုလည်း စက္ကန့် ၃၀ လောက်ထိရအောင် မနားဘဲပြုလုပ်ပေးဖို့လိုပါတယ်။
လေ့ကျင့်ခန်း ၄
ဒူးထောက်ပြီး ခါးမတ်ထားတာ လက်နှစ်ဖက်ကို တောင်ပံခတ်သလို အပေါ်အောက် ဖြေးဖြေးချင်း ရွှေ့ပေးရမှာဖြစ်ပါတယ်။ စက္ကန့် ၃၀ ပြုလုပ်ပေးရပါမယ်။
လေ့ကျင့်ခန်း ၅
ဒီလေ့ကျင့်ခန်းအတွက် လက်ချောင်းအချင်းချင်းချိတ်ကာ ခေါင်းနောက်ကို ပို့ထားပြီး လက်ကို အပေါ်တင်၊ အောက်ချ စက္ကန့် ၃၀ ခန့် ပြုလုပ်ပေးရမှာဖြစ်ပါတယ်။
လေ့ကျင့်ခန်း ၆
လက်နှစ်ဖက်ကို ဘေးမှာမြှောက်ထားကာ ၉၀ ဒီဂရီပုံစံကွေးပြီး လက်မြှောက်လိုက်၊ ပြန်ကွေးလိုက် ပြုလုပ်ပေးလိုက်ပါ။ ဒါကိုလည်း ဖြေးဖြေးချင်း စက္ကန့် ၃၀ လောက်ပြုလုပ်ပေးပါ။
လေ့ကျင့်ခန်း ၇
နောက်ဆုံးလေ့ကျင့်ခန်းလေးကတော့ လက်တွေကိုကားပြီး လက်ချောင်းတွေကိုခပ်ဝိုက်ဝိုက်ထားကာ ရှေ့နဲ့နောက် သက်တံ့ဆွဲသလို လုပ်ပေးရမှာဖြစ်ပါတယ်။ သူ့ကိုလည်း စက္ကန့် ၃၀ ခန့်အထိရအောင်ပြုလုပ်ပေးပါ။
Photo Source: Youtube
