Dry Skin ရှိတဲ့ ပျိုမေတို့အတွက် သဘာဝအတိုင်း အသားခြောက်တာသက်သာစေမယ့် ထိန်းသိမ်းနည်း (၄) မျိုး

မင်္ဂလာပါ ပျိုမေတို့ရေ။ Dry Skin ကြောင့် အသားအရေထိန်းသိမ်းရတာ အခက်တွေ့နေရတဲ့သူတွေရှိလား။ ဒါဆိုရင်တော့ ဒီဆောင်းပါးက သင့်အတွက်ပါပဲ။ အသားခြောက်တာသက်သာဖို့ ထိန်းသိမ်းမှုတွေလုပ်နေပေမယ့် ထင်သလောက်မထိရောက်သလို ခံစားနေရတဲ့သူတွေအတွက် အကုန်အကျနည်းနည်းနဲ့ ကိုယ်တိုင်လုပ်လို့ရမယ့် ထိန်းသိမ်းနည်းအချို့ကို ဖော်ပြပေးသွားမှာပါ။ ပုံမှန် Dry Skin ရှိသူတွေနဲ့ ရာသီဥတုကြောင့် အသားခြောက်တတ်သူတွေအတွက်ပါ အသုံးဝင်စေမှာဖြစ်လို့ စမ်းလုပ်ကြည့်ဖို့ စိတ်ဝင်စားတယ်ဆိုရင် ကြည့်လိုက်ရအောင်နော်-

အစိုဓာတ်ဖြည့် Milk Lotion လုပ်နည်း

နို့အမျိုးမျိုးမှာပါတဲ့ Lactic Acid က ဆဲလ်သေတွေကို ဖယ်ရှားပေးပြီး အရေပြားအတွင်းထဲထိ အစိုဓာတ် စိမ့်ဝင်စေတာကြောင့် အသားခြောက်သူတွေသုံးဖို့ အဆင်ပြေပါတယ်။ ဒီနည်းအတွက် နို့တစ်ခွက်စာကို နွေးသွားအောင်ကျိုပြီး Glycerine အဆီ တစ်ဇွန်း၊ မုန့်ဖုတ်ဆိုဒါ ဇွန်းလေးပုံတစ်ပုံခန့် ထည့်ပေးပါ။ ပါဝင်ပစ္စည်းတွေ ပျော်ဝင်သွားအောင် မွှေပြီး တစ်နာရီခန့် အအေးခံထားရပါမယ်။ အေးသွားတဲ့အခါ အသားခြောက်တဲ့နေရာတွေမှာ လိမ်းပေးနိုင်ပါတယ်နော်။ မိနစ်အနည်းငယ်ထားပြီး ရေနဲ့ဆေးချပေးပါ။

Cleanser ပြုလုပ်နည်း

ဒီသဘာ၀ Cleanser လုပ်နည်းက သင့်အရေပြားအဆီဆုံးရှုံးမှုမရှိဘဲ ခြောက်သွေ့တဲ့ အသားအရေကိုသန့်စင်ပေးနိုင်ပါတယ်။ ဒီနည်းအတွက် ခွက်တစ်ခွက်ထဲမှာ Vaseline အနည်းငယ်၊ Baby Oil လေးဇွန်း၊ Beeswax တစ်ဇွန်းခန့် ရောပြီး အပူပေးပါ။ ပါဝင်ပစ္စည်းအားလုံး ပျော်ဝင်သွားတဲ့အခါ အနံ့အတွက် နှင်းဆီရည်အနည်းငယ်ထည့်ပါမယ်။ ပြီးနောက် ဘူးအလွတ်ထဲထည့်ကာ အအေးခံပြီး မျက်နှာကို သန့်စင်ပေးနိုင်ပါတယ်။

ရေဓာတ်ဖြည့် Moisturizer ပြုလုပ်နည်း

Dry Skin အတွက်အစိုဓာတ်ဖြည့်ဖို့ လိုတာမို့ Moisturizer ကို နှင်းဆီရည်၊ Glycerine အဆီနဲ့ ပျားရည်တို့ကိုသုံးပြီး ကိုယ်တိုင်လုပ်နိုင်ပါတယ်နော်။ နှင်းဆီရည် ခွက်တစ်ဝက်ခန့်ကို Glycerine အဆီ လေးပုံတစ်ပုံ၊ ပျားရည် အနည်းငယ်ထည့်ပြီး သမအောင် မွှေပေးပါ။ ရလာတဲ့အရောကို ခွက်အလွတ်တစ်ခုထဲထည့်ကာ မျက်နှာသစ်ပြီးတိုင်း ပုံမှန်လိမ်းပေးနိုင်ပါတယ်။

အရေပြားအတွင်းပိုင်းထိ အစိုဓာတ်ဖြည့်ဖို့ Banana Mask ပြုလုပ်နည်း

အသားခြောက်တာသက်သာဖို့ ဌက်ပျောသီးကိုသုံးပြီး ပေါင်းတင်နိုင်ပါတယ်နော်။ ဌက်ပျောသီးမှာပါတဲ့ ပိုတက်ဆီယမ်နဲ့ ဗီတာမင်ဓာတ်တွေက အသားအရေအစိုဓာတ်ပြည့်စေတာမို့ ဌက်ပျောသီးအမှည့်တစ်လုံးကို ကြိတ်ကာ ပျားရည်၊ ဒိန်ချဉ်တို့ကို အနည်းငယ်ရောထည့်ပေးပါ။ ရလာတဲ့အနှစ်ကို မျက်နှာမှာလိမ်းကာ မိနစ် ၂၀ လောက်ပေါင်းတင်ထားရုံပါပဲ။ ဒီနည်းလေးက အသားအရေကို သန့်စင်ပေးပြီး အစိုဓာတ်ပြည့်စေတာမို့ တစ်ပတ်မှာ တစ်ကြိမ်ပုံမှန် သုံးပေးနိုင်ပါတယ်။