ဆံပင်ပုံစံဒီဇိုင်းတွေနဲ့ ဆံပင်ပြင်ဆင်မှုတွေက လူတစ်ယောက်ကိုပြောင်းလဲသွားစေပါတယ်။ မိန်းကလေးတွေဆိုတော့ အမြဲတမ်းလှနေဖို့လည်း လိုပါသေးတယ်။ ဒါကြောင့် ပျိုမေတို့ကို လူငယ်ဆန်ဆန်နဲ့ ချစ်စရာကောင်းသွားစေမယ့် ဆံပင်ပြင်ဆင်ပုံလေးမျိုးကို ဖော်ပြပေးလိုက်ပါတယ်။ အချိန်တိုအတွင်းမှာ မြန်မြန်ပြင်ဆင်လို့ရတာဖြစ်လို့ ပျိုမေတို့လည်း သဘောကျနှစ်သက်မယ်လို့ထင်ပါတယ်။

ပထမတစ်မျိုးအတွက် အရှေ့ဆံပင်ကိုနည်းနည်းချပြီး ဆံပင်နှစ်ဖက်ကိုခွဲကာ တစ်ဖက်ကို ခေါင်းစည်းကြိုးနဲ့စည်းထားပါ။ နောက်တစ်ဖက်ကိုတော့ ဆံပင်ကိုလိမ်ပြီး အပေါ်နားလေးမှာမြင့်မြင့်လေးထုံးပြီး သားရေကွင်းနဲ့ပတ်လိုက်ပါ။ နောက်တစ်ဖက်ကိုလည်း ဒီနည်းအတိုင်းပဲလုပ်ပေးပါ။ ဆံထုံးထုံးထားတာလေးကို ခိုင်နေစေဖို့ ကလစ်အမဲလေးတွေနဲ့ ထိုးပေးပါ။

ဒုတိယတစ်မျိုးအတွက် ဆံပင်ကိုလိမ်လိမ်ပြီးယူကာ ထိပ်မှာဆံထုံးလေးထုံးပေးရပါမယ်။ ပြီးရင်တော့ ခေါင်းစည်းကြိုးအနက်ရောင်နဲ့ပတ်ပြီး ကလစ်လေးတွေထိုးပေးပါ။ အရှေ့ဆံစလေးတွေကို နည်းနည်းချလိုက်ရင်တော့ အရမ်းချစ်စရာကောင်းသွားမှာပါ။

တတိယတစ်မျိုးအတွက် ဆံပင်ကိုတစ်ဝက်စည်းသလောက်ယူပြီး ခုနကလိုပဲဆံပင်တွေကို လိမ်လိမ်ပြီးယူကာ ဆံထုံးထုံးပေးရပါမယ်။ ပြီးတာနဲ့ ခေါင်းစည်းကြိုးအနက်ရောင်လေးနဲ့ပတ်ပြီး ကလစ်လေးတွေထိုးလိုက်မယ်ဆိုရင်တော့ အရမ်းချစ်စရာကောင်းတဲ့ ဆံပင်ပုံစံလေးကို ရရှိသွားမှာပါ။

နောက်ဆုံးတစ်မျိုးအတွက် ဆံပင်ကိုတစ်ဝက်စည်းသလောက်ယူပြီး လှန်တင်လိုက်ပါ။ ကျန်တဲ့အောက်နားကဆံပင်တွေကိုတော့ ခေါင်းစည်းကြိုးနဲ့ ခဏစည်းထားလိုက်ပါ။ ပြီးတာနဲ့ အပေါ်ကဆံပင်တွေကို အလယ်ခွဲပေးပြီး ကျစ်ဆံမြီးအသေးလေးကျစ်ပေးပါ။ ဆံပင်တစ်ဝက်လောက်ရောက်ရင်တော့ ဆံသားတွေကိုလိမ်ယူပြီး ဆံထုံးလေးထုံးပေးလိုက်ပါ။

နောက်တစ်ဖက်ကိုလည်း ဒီတိုင်းပဲလုပ်ပေးရပါမယ်။ အားလုံးပြီးသွားရင်တော့ ခုနကစည်းထားတဲ့ အောက်နားကဆံပင်တွေကို ပြန်ချထားလိုက်ရုံပါပဲ။

Photo Source: www.deviennamakeup.com