ရိုးရှင်းပြီးချစ်ဖို့ကောင်းတဲ့ လက်သည်းဒီဇိုင်း ၃ မျိုးကို ကိုယ်တိုင်အလွယ်တကူပုံဖော်နည်းအဆင့်ဆင့်

လက်သည်းပုံဖော်ရတာ ဝါသနာပါတဲ့ မိန်းကလေးတွေအတွက် တစ်ခါတစ်လေကျရင် budget ချွေတာတဲ့အနေနဲ့ ဆိုင်သွားပြီး ပုံဖော်စရာမလိုအောင် ကိုယ်တိုင်ပုံဖော်လို့ရမယ့် နည်းလမ်းလေးတွေကို မျှဝေပေးချင်ပါတယ်။ ဒီတစ်ခါမှာတော့ ရိုးရှင်းပြီးချစ်ဖို့ကောင်းတဲ့ လက်သည်းဒီဇိုင်း ၃ မျိုးကို ကိုယ်တိုင် အလွယ်တကူပုံဖော်ရမယ့် နည်းလမ်းအဆင့်ဆင့်ကို မျှဝေပေးလိုက်ပါတယ်။

ပထမဆုံးအနေနဲ့ သစ်ရွက်ပုံစံ လက်သည်းဒီဇိုင်းလေးကို ပုံဖော်ပါမယ်။ လိုအပ်တဲ့ လက်သည်းနီအရောင်ကတော့ အဝါ၊ အစိမ်း၊ အနီနဲ့ ရွှေရောင်ပါ။ အရင်ဆုံး base coat ဆိုးပါ။

ပြီးရင် လက်သည်းနီ အဝါ၊ အစိမ်းနဲ့ အနီရောင်ကို ကိုယ်ကြိုက်တဲ့ လက်ချောင်းမှာ တစ်ခြမ်းစီလိုက်ဆိုးပေးပါ။

ရွှေရောင်လက်သည်းနီကို ပုံမှာပြထားတဲ့အတိုင်း အလယ်တည့်တည့်မှာ မျဉ်းတစ်ကြောင်းဆွဲ၊ ပြီးရင် သစ်ရွက်ပုံရအောင် မျဉ်းတစ်စောင်းလေးတွေ လိုက်ဆွဲပေးရုံပါပဲ။

နောက်ဆုံးမှာတော့ top coat ဆိုးပါမယ်။ ဒါဆိုရင်တော့ လှပတဲ့ သစ်ရွက်ပုံစံ လက်သည်းဒီဇိုင်းလေးကို ရရှိသွားပါပြီ။

ဒုတိယလက်သည်းဒီဇိုင်းလေးကတော့ ပိုပြီးရိုးရှင်းပါတယ်။ လိုအပ်တဲ့ လက်သည်းနီအရောင်ကလည်း အနီနဲ့အပြာပါပဲ။ အရင်ဆုံး top coat အရင်ဆိုးပါမယ်။

ပြီးမှ လက်သည်းနီ အနီရောင်ကို အောက်နားနည်းနည်းချန်ပြီး ဆိုးပေးပါ။

လက်သည်းနီအပြာကို ပုံမှာပြထားတဲ့အတိုင်း အစက်လေး ၃ စက် လိုက်ချပေးရုံပါပဲ။

နောက်ဆုံးမှာတော့ top coat ဆိုးလိုက်ပါ။ ဒါဆိုရင်တော့ ရိုးရှင်းပြီး ချစ်ဖို့ကောင်းတဲ့ လက်သည်းဒီဇိုင်းလေးကို ရသွားပါပြီ။

နောက်ဆုံးလက်သည်းဒီဇိုင်းကတော့ အဖြူရောင်လေးမို့ ရိုးရိုးရှင်းရှင်းလေးနဲ့ အရမ်းလှပါတယ်။ လိုအပ်တဲ့ လက်သည်းနီအရောင်က အဖြူရောင်ပါပဲ။ ပြီးရင်တော့ ရွှေရောင်အဖတ်လေးတွေကပ်ဖို့ လိုပါတယ်။

အရင်ဆုံး top coat အရင်ဆိုးပါမယ်။ အဖြူရောင်ကို လက်သည်းမှာ တစ်စောင်းလေးဆိုးပေးပါ။ ပြီးရင် top coat ဆိုးပါ။

ပြီးမှ ရွှေရောင်အဖတ်လေးတွေကို သွားကြာထိုးတံလေးနဲ့ယူပြီး ပုံမှာပြထားတဲ့အတိုင်း ကပ်ပေးပါ။

နောက်ဆုံးမှာတော့ ထုံးစံအတိုင်း top coat ထပ်ဆိုးလိုက်ရုံပါပဲ။ ဒါဆိုရင်တော့ ရိုးရိုးရှင်းရှင်းလေးနဲ့လှတဲ့ အဖြူရောင် လက်သည်းဒီဇိုင်းလေးကို ရသွားပါပြီ။