အသားအရေညစ်နေလို့၊ အသားကြည်ချင်လို့ဆိုတဲ့သူတွေအတွက် အသားအရေကြည်လင်လာစေဖို့ သံပယိုသီးကိုသုံးပြီး မျက်နှာပေါင်းတင်လို့ရတဲ့ နည်းလမ်း ၃ ခုကို မျှဝေပေးလိုက်ပါတယ်။ အိမ်မှာ အလွယ်တကူလုပ်လို့ရတဲ့ သဘာဝပေါင်းတင်နည်းတွေ ဖြစ်တာကြောင့် လူတိုင်းလုပ်ရတာ အဆင်ပြေပါတယ်။ ကိုယ့်အသားအရေက အရမ်း Sensitive ဖြစ်တယ်ဆိုရင်တော့ တည့်မတည့် အရင်စမ်းကြည့်ပြီးမှလုပ်ပါ။
သံပယိုသီးနဲ့ပျားရည်
သံပယိုသီးကို လက်ဖက်ရည်ဇွန်း ၁ ဇွန်းစာ ရအောင်ညှစ်ပြီးတော့ ပျားရည် စားပွဲတင်ဇွန်း ၁ ဇွန်း၊ ရေ စားပွဲတင်ဇွန်း ၁ ဇွန်းနဲ့ ရောမွှေပါ။ ပြီးရင် မျက်နှာနဲ့လည်ပင်းကိုလိမ်းပြီး ၁၅ မိနစ်ထားပါ။ အချိန်ပြည့်ရင် ရေကြက်သီးနွေးနဲ့ မျက်နှာသစ်ပေးပါ။ တစ်ပတ်ကို ၁ ကြိမ်၊ ၂ ကြိမ် ပုံမှန်လုပ်ပေးရင် အသားအရေ ကြည်လာမယ်၊ အသားအရေ နူးညံ့လာပါမယ်။
သံပယိုသီးနဲ့ရှားစောင်းလက်ပတ်
သံပယိုသီးကို တစ်ခြမ်းခြမ်းပြီး အရည်ရအောင် ညှစ်ချပါ။ ရှားစောင်းလက်ပတ်အတွင်းသား ဂျယ်လ်ကို စားပွဲတင်ဇွန်း ၂ ဇွန်းစာခြစ်ယူပြီး ခုနကညှစ်ထားတဲ့ သံပယိုရည်နဲ့ ရောမွှေပါ။ ပျားရည်ကိုပါ လက်ဖက်ရည်ဇွန်း ၁ ဇွန်းထည့်မွှေပါ။ ပြီးရင်တော့ မျက်နှာနဲ့လည်ပင်းကို လိမ်းပေးပြီး ခြောက်ပြီဆိုမှ ရေကြက်သီးနွေးနဲ့ မျက်နှာသစ်ပါ။ တစ်ပတ်ကို ၁ ကြိမ်၊ ၂ ကြိမ် ပုံမှန်လုပ်ပေးရင် အသားအရေကြည်ပြီး Hydration ပြည့်ဝသလိုလေး ဖြစ်နေမှာပါ။
သံပယိုသီးနဲ့ငှက်ပျောသီး
သံပယိုသီးကို စားပွဲတင်ဇွန်း ၁ ဇွန်းစာရအောင် အရည်ညှစ်ချပြီး ငှက်ပျောသီး တစ်ဝက်နဲ့ ရောမွှေပါ။ ငှက်ပျောသီးကို ကြေအောင်ချေပေးပါ။ ပျားရည်လည်း လက်ဖက်ရည်ဇွန်း ၁ ဇွန်း ထည့်မွှေပါ။ ပြီးရင်တော့ မျက်နှာမှာလိမ်းပေးပြီး ၁၅ မိနစ်ထားပါ။ အချိန်ပြည့်ရင် ရေကြက်သီးနွေးနဲ့ မျက်နှာသစ်လိုက်ရုံပါပဲ။ ဒီနည်းလမ်းကို လုပ်မယ်ဆိုရင်လည်း တစ်ပတ်မှာ ၁ ကြိမ်၊ ၂ ကြိမ် ပုံမှန်လုပ်ပေးရမှာ ဖြစ်ပါတယ်။
