မိုးရာသီမှာ ဆံသားပျက်စီးတာတွေက ပိုပြီးအဖြစ်များပါတယ်။ ဒါကြောင့် မိုးရာသီမှာ ဆံသားပျက်စီးတာ သက်သာစေမယ့် ဆံပင်ပေါင်းတင်နည်း ၃ မျိုးကို ဖော်ပြပေးလိုက်ပါတယ်။ သဘာဝပေါင်းတင်နည်းတွေ ဖြစ်တာကြောင့် အိမ်မှာ အလွယ်တကူ ပေါင်းတင်နိုင်ပါတယ်။ နည်းလမ်း ၃ မျိုးရှိတာကြောင့် ကိုယ့်ဆံသားပေါ်မူတည်ပြီး တစ်ခုကို လုပ်ပေးရုံပါပဲ။
နည်းလမ်း ၁
ငှက်ပျောသီးအမှည့် – ၁ လုံးနဲ့ ထောပတ်သီးအမှည့် – ၁ လုံးကို ကျေညက်သွားအောင် ရောချေပေးပါ။ ကျေညက်သွားပြီဆိုရင်တော့ သံလွင်ဆီ – စားပွဲတင်ဇွန်း ၁ ဇွန်းထည့်ပြီး သမအောင်မွှေပါ။ ပြီးရင်တော့ ဦးရေပြားနဲ့ ဆံသားမှာ သေချာနှံ့အောင်လိမ်းပြီး မိနစ် ၃၀ ထားပါ။ အချိန်ပြည့်ရင် ခေါင်းလျှော်လိုက်ရုံပါပဲ။
ဒီနည်းလမ်းကို တစ်ပတ်မှာ ၂ ကြိမ်လုပ်ပေးရင် မိုးတွင်းမှာ ဆံပင်ကျွတ်တာသက်သာစေပြီး ဆံသားပျော့ပြောင်းစေတယ်၊ ဆံပင်ပျက်စီးတာလည်း သက်သာစေပါတယ်။
နည်းလမ်း ၂
သံပယိုရည်နဲ့ပျားရည်ကို ဆတူရောပြီး ဦးရေပြားနဲ့ ဆံသားမှာ ပွတ်လိမ်းပေးပါ။ ပြီးရင် တစ်နာရီထားပြီး အချိန်ပြည့်မှ ခေါင်းလျှော်ပေးပါ။
ဒီနည်းလမ်းကိုတော့ တစ်ပတ်မှာတစ်ကြိမ် ပုံမှန်လုပ်ပေးမယ်ဆိုရင် ဗောက်ထတာ၊ ဦးရေပြားယားယံတာတွေ သက်သာစေပါတယ်။
နည်းလမ်း ၃
ငှက်ပျောသီးအမှည့် – ၁ လုံးကိုချေပြီး ဒိန်ချဉ် – စားပွဲတင်ဇွန်း ၂ ဇွန်း၊ အုန်းဆီ – စားပွဲတင်ဇွန်း ၁ ဇွန်းနဲ့ ရောမွှေပါ။ ပြီးရင်တော့ ဦးရေပြားနဲ့ ဆံသားမှာ သေချာနှံ့အောင်ပွတ်လိမ်းပြီး ၁ နာရီခွဲထားပေးရပါမယ်။ အချိန်ပြည့်ရင်တော့ ခေါင်းလျှော်လိုက်ရုံပါပဲ။
ဒီနည်းလမ်းကိုတော့ တစ်ပတ်မှာ ၁ ကြိမ် (သို့) ၂ ကြိမ် ပုံမှန်လုပ်ပေးမယ်ဆိုရင် ဆံပင်သန်ပြီး ဆံသားပျက်စီးတာတွေလည်း သက်သာလာစေပါတယ်။
