ဗိုက်ချပ်ဖို့က ကိုယ့်ဗိုက်မှာ ရှိတဲ့ အဆီပမာဏအရ၊ ဇီဝဖြစ်စဉ်အရ တစ်ယောက်နဲ့ တစ်ယောက် ယူရတဲ့ အချိန် မတူနိုင်ပါဘူး။ အဆီပို များတဲ့သူက များသလို ဗိုက်ကျဖို့ အချိန်ပိုကြာတတ်ပါတယ်။ လေ့ကျင့်ခန်း အပြင် ဗိုက်အဆီကျဖို့အတွက် အစားအသောက်ကိုပါ ဂရုစိုက်ဖို့ လိုပါသေးတယ်။ ဒီတစ်ခေါက်မှာတော့ အစားအသောက်ကို ဂရုစိုက်ရမယ့်အပြင် ဒါနဲ့ တွဲလျက် ပြုလုပ်နိုင်မယ့် ထိရောက်တဲ့ ဗိုက်လေ့ကျင့်ခန်းတွေကို ဖော်ပြပါရစေ။ ၁၅ ရက်အတွင်း ထိရောက်မှာမို့ သင့်အတွက် လုပ်ရကျိုးနပ်မယ့် လေ့ကျင့်ခန်းတွေ ဖြစ်မှာပါ။ ဒီတော့ လေ့ကျင့်ခန်းတွေကို ကြည့်လိုက်ရအောင်နော်-

၁။ Ankle Taps

Photo Source: Spotebi

ဒီလေ့ကျင့်ခန်းက ဗိုက်အောက်ဘက် အဆီနဲ့ ခါးဘေး အဆီကိုပါ တစ်ပြိုင်တည်း ထိစေမယ့် ဗိုက်လေ့ကျင့်ခန်း ဖြစ်ပါတယ်။ ဒူးကွေးကာ အိပ်လျက်အနေအထားနဲ့ ပခုံးနဲ့ ခန္ဓာကိုယ်ကို ကြမ်းပြင်နဲ့ မထိထားဘဲ ခန္ဓာကိုယ်ကို ဘယ်ညာ ယိမ်းပေးရပါမယ်။ ဒီလို ဘယ်ညာ သွားတဲ့အခါ လက်ထိပ်နဲ့ ခြေချင်းဝတ် နားကို ထိပေးရပါမယ်။ ဒီလေ့ကျင့်ခန်းကို အခါ ၃၀ စာ သုံးကြိမ် လုပ်ပေးရပါမယ်။

၂။ Knee to Elbow Touches

Photo Source: Robotec

ဗိုက်အောက်ဘက် အဆီတွေကျစေမယ့် အပြင် လက်နဲ့ ခြေထောက်ကိုပါ လှုပ်ရှားရတာမို့ တစ်ကိုယ်လုံးစာ ထိရောက်စေမယ့် လေ့ကျင့်ခန်း ဖြစ်ပါတယ်။ လေးဘက်ထောက် အနေအထားနဲ့ စ နေပေးရပါမယ်။ ပြီးနောက် ဘယ်လက်နဲ့ ညာ ဒူးကို ထိပေးရပါမယ်။ ထိပြီးတာနဲ့ ဒီ ဘယ်လက်ကို မြှောက်ကာ တစ်ချိန်တည်းမှာပဲ ညာခြေထောက်ကို တစ်တန်းတည်း မြှောက်ပေးရပါမယ်။ ဒီလေ့ကျင့်ခန်းကို အခါ ၂၀ စာ သုံးကြိမ်လုပ်ရပါမယ်။

၃။ Bicycle Crunches

Photo Source:  We Heart it

အိပ်လျက်အနေအထားနဲ့ လက်နှစ်ဘက်ကို ခေါင်းနောက်မှာ စုကာ ထားပေးရပါမယ်။ ခြေထောက်နှစ်ဘက်ကို ဆန့်တန်းကာ ညာတံတောင်နဲ့ ဘယ်ဒူးထိအောင် ခန္ဓာကိုယ်ကို လှိမ်ပေးရပါမယ်။ ဘယ်ညာ တစ်လှည့်စီ လုပ်ပေးရပါမယ်။ ဘယ်ညာ တစ်စုံစာ ပြည့်မှ တစ်ကြိမ်လို့ သတ်မှတ်ရပါမယ်။ အခါ ၂၀ စာ သုံးကြိမ်လုပ်ရပါမယ်။

၄။ Plank Dips

Photo Source: Tenor

ဗိုက်မှာ Six Pack ထွက်လာပြီး ခါးပိုသေးလာစေမယ့် Plank Dips လေ့ကျင့်ခန်းကို မေ့ထားလို့ မရပါဘူး။ Plank ထောက်တဲ့ အနေအထားနဲ့ စကာ ခန္ဓာကိုယ်ကို ဘယ်တစ်လှည့် ညာတစ်လှည့် ကွေးပေးရပါမယ်။ Plank Dips ကီု အခါ ၂၀ စာ သုံးကြိမ်လုပ်ပေးရပါမယ်။

By MyStyle Myanmar