Boy Love ဇာတ်လမ်းကြိုက်နှစ်သက်သူတွေအတွက် ၂၀၂၂ ခုနှစ်မှာထွက်ရှိမယ့် ကိုးရီးယား BL Drama ဇာတ်လမ်းတွဲ (၁၀) ခု

K-Drama ဇာတ်လမ်းတွဲကြိုက်ပရိသတ်တွေ အားလုံးပဲမင်္ဂလာပါနော်။ အခုခေတ်လူငယ်တွေကြားမှာ မင်းသားနှစ်ဦးရဲ့ အချစ်ဇာတ်လမ်းကို အခြေခံထားတဲ့ Boy Love (BL) ဇာတ်လမ်းတွေကလည်း လူကြိုက်များရေပန်းစားနေပြီဖြစ်လို့ BL ဇာတ်လမ်းတွဲကိုမှ K-Drama ဆန်ဆန်ကြည့်ချင်သူတွေအတွက် ဒီနှစ်ထဲမှာထွက်ရှိလာမယ့် ကိုးရီးယား BL ဇာတ်လမ်းတွဲ ၁၀ ခုကို ဖော်ပြပေးလိုက်ပါတယ်။

ကိုးရီးယားနိုင်ငံရဲ့ BL ဒရမ်မာဇာတ်လမ်းတွဲရိုက်ကူးမှုကိုတော့ ၂၀၂၁ ခုနှစ်လောက်ကမှ စတင်ခဲ့တာဖြစ်ပြီး အခုနှစ်မှာ ဇာတ်လမ်းတွဲတွေပိုများလာတာကိုလည်း တွေ့ရပါတယ်။ အခုဖော်ပြထားတဲ့ဇာတ်လမ်းလေးတွေက လူငယ်ဆန်ဆန် ပေါ့ပေါ့ပါးပါးလေးတွေဖြစ်လို့ BL ဇာတ်လမ်းကြိုက်ပရိသတ်တွေအားလုံး အကြိုက်တွေ့စေမှာပါ။ ဒီတော့ စိတ်ဝင်စားရင်ဆက်ကြည့်လိုက်ရအောင်-

၁။ “Color Rush” (Season 2)

၂၀၂၁ ခုနှစ်က Season 1 ထွက်ပြီးနောက် အခုနှစ်ဇန်နဝါရီလမှာ Season 2 အနေနဲ့ထပ်မံထွက်ရှိလာတာ ဖြစ်ပါတယ်။ ဒီဇာတ်လမ်းထဲမှာ “YeonWoo” ဆိုတဲ့ကောင်လေးရဲ့အကြောင်းနဲ့ သူ့ကိုကာကွယ်ပေးမယ့် “SeHyun” တို့ရဲ့ အချစ်ဇာတ်လမ်းကိုရိုက်ကူးထားပြီး မင်းသား Yoo Jun နဲ့ Idol တစ်ဦးဖြစ်တဲ့ VIXX အဖွဲ့ဝင် Hyuk တို့က ပါဝင်သရုပ်ဆောင်ထားကြပါတယ်။

၂။ “Semantic Error”

နာမည်ကြီး BL ဝတ္ထုကိုပြန်လည်ရိုက်ကူးထားပြီး ဖေဖော်ဝါရီလထဲမှာ ထွက်ရှိခဲ့တဲ့ “Semantic Error” ကိုတော့ Idol တွေဖြစ်ကြတဲ့ KNK ရဲ့အဖွဲ့ဝင်ဟောင်း Park SeoHam နဲ့ DONGKIZ အဖွဲ့ဝင် Park JaeChan တို့က အတွဲညီညီသရုပ်ဆောင်ထားကြတာဖြစ်ပါတယ်။ ဒီဇာတ်ကားမှာတော့ အရာရာကို အစီအစဉ်တကျလုပ်တတ်ပြီး အနေအေးတဲ့ ဂျူနီယာလေး “SangWoo” နဲ့ ကျောင်းမှာပေါ်ပြူလာဖြစ်တဲ့အပြင် အစအနောက်သန်ပြီး ကြင်နာတတ်တဲ့ စီနီယာ “JaeYoung” တို့ရဲ့ ကြောင်နဲ့ကြွက်လိုဆက်ဆံရေးကနေ အရောင်ပြောင်းလာတဲ့ အချစ်ဇာတ်လမ်းလေးအကြောင်းကို ကြည့်ရှုကြရမှာပါ။

၃။ “Cherry Blossoms After Winter”

နောက်ထပ်ဖေဖော်ဝါရီလမှာထွက်ရှိခဲ့တဲ့ ဇာတ်လမ်းတွဲတစ်ခုဖြစ်ပြီး ငယ်စဉ်ကတည်းကခင်မင်ခဲ့ကြတဲ့ လူငယ်လေးနှစ်ဦးရဲ့ ခင်မင်မှုကနေ အချစ်အဖြစ်ပြောင်းလဲလာတဲ့အကြောင်းကို ရိုက်ကူးထားတာပဲဖြစ်ပါတယ်။ ဒီကားကိုတော့ Super Five အဖွဲ့ဝင် Ok JinWook နဲ့ မင်းသား Kang Hui တို့ကပါဝင်သရုပ်ဆောင်ထားတာပါ။

၄။ “To My Star” (Season 2)

၂၀၂၁ ခုနှစ်ကထွက်ရှိခဲ့တဲ့ “To My Star” ဇာတ်လမ်းတွဲကလည်း Season 2 အနေနဲ့ ဒီနှစ်မှာပြန်လည် ထွက်ရှိမှာဖြစ်ပြီး Season 1 မှာပါဝင်ခဲ့တဲ့ မင်းသား Son WooHyeon နဲ့ Kim KangMin တို့ကပဲ ထပ်မံပါဝင်ရိုက်ကူးထားတာကိုတွေ့ရပါတယ်။

၅။ “First Love Again”

ဒီကားကိုတော့ မင်းသား Jin Gun နဲ့ Jeon ChangHa တို့ပါဝင်သရုပ်ဆောင်ထားတာဖြစ်ပြီး အရင်ဘဝကိုပြန်လည်မှတ်မိနိုင်တဲ့စွမ်းရည်ရှိတဲ့ စာရေးဆရာ “YeonSeok” က သူ့ရဲ့ First Love ဖြစ်တဲ့ “HaYeon” နဲ့တွေ့ရဖို့ သုံးဘဝကြာရှာဖွေခဲ့တဲ့ အချစ်ဇာတ်လမ်းလေးအကြောင်းကို ရိုက်ကူးထားတာပဲ ဖြစ်ပါတယ်။

၆။ “Crush Of Spring”

“Crush Of Spring” ကတော့ ဒီနှစ်ထဲမှာ သမိုင်းနောက်ခံ အချစ်ဇာတ်လမ်းတွဲအဖြစ် ထွက်ရှိလာမယ့် Drama ကားတစ်ကားဖြစ်ပြီး မင်းသား Kim Song နဲ့ B.A.P အဖွဲ့ဝင်ဟောင်း Yoo YoungJae တို့က ပါဝင်သရုပ်ဆောင်ထားကြပါတယ်။

၇။ “Kissable Lips”

ဒီကားကတော့ “MinHyun” လို့ခေါ်တဲ့ သန့်စင်သွေးရှိလူသားနဲ့ လူပြန်ဝင်စားနိုင်ဖို့ သန့်စင်သွေးလိုအပ်နေတဲ့ သွေးစုပ်ဖုတ်ကောင် “JunHo” တို့ကြားက အချစ်ဇာတ်လမ်းလေးကိုရိုက်ကူးထားတာဖြစ်ပြီး သရုပ်ဆောင်တွေအဖြစ် Kim JiWoong နဲ့ Yoon SeoBin တို့ကပါဝင်ထားပါတယ်။

၈။ “Ocean Likes Me”

မင်းသား Han GiChan နဲ့ အဆိုတော် Holland တို့ပါဝင်သရုပ်ဆောင်ထားတဲ့ “Ocean Likes Me” ကလည်း ဒီနှစ်ထဲမှာ ထွက်လာဖို့ရှိပြီး ဒီကားထဲမှာ အိပ်မက်သစ်ရှာဖွေဖို့ မွေးရပ်မြေပြန်လာတဲ့ ဂီတသမားတစ်ဦးနဲ့ အောင်မြင်တဲ့စီးပွားရေးလုပ်ငန်းတစ်ခုပိုင်ဆိုင်ချင်တဲ့ စားသောက်ဆိုင်ပိုင်ရှင်လေးတို့ရဲ့ တွေ့ဆုံမှု အကြောင်းကိုရိုက်ကူးထားတာဖြစ်ပါတယ်။

၉။ “Oh! Boarding House”

ဒီကားကတော့ အိမ်အတူဌားနေကြတဲ့ ကောင်လေးနှစ်ယောက်ရဲ့ကြည်နူးစရာအချစ်ဇာတ်လမ်း အကြောင်းရိုက်ကူးထားတဲ့ Drama တစ်ခုဖြစ်ပြီး မင်းသား Im SungKyun နဲ့ Shin YongSeok တို့ပါဝင်သရုပ်ဆောင်ထားကြတာဖြစ်ပါတယ်။

၁၀။ “Blue Of Winter”

ဒီနှစ် မတ်လမှာထွက်ရှိလာတဲ့ Drama ဖြစ်ပြီး ဂျူဒိုပြိုင်ပွဲကတစ်ဆင့် တွေ့ခဲ့ကြတဲ့ အထက်ကျောင်းသားတွေရဲ့ဘဝအကြောင်းကို ရိုက်ကူးထားတာဖြစ်ပါတယ်။ ဒီကားထဲမှာ အဓိကဇာတ်ဆောင်အနေနဲ့ ပွဲဦးထွက်မင်းသားတွေဖြစ်ကြတဲ့ Jeon YuBin ၊ Min InGi ၊ Lee JeongMin နဲ့ Yoo YoungMo တို့ကပါဝင်သရုပ်ဆောင်ထားကြပါတယ်။