တနေ့တာလုံးသွားလာလှုပ်ရှားနေရသည်နှင့်အမျှ သင့်အသားရေသည်လည်း ပူပြင်းခြောက်သွေ့လွန်းလှသည့် ခရမ်းလွန်နေရောင်ခြည်များ၊ ဖုန်မှုန့်များ၊ လေထုထဲရှိအညစ်အကြေးများ၊ ကြမ်းတမ်းသောဓာတ်သတ္တုများ နှင့် အမျိုးမျိုးသောပတ်ဝန်းကျင်အခြေအနေများနှင့် မကြာခဏထိတွေ့နေရပါတယ်။

အချိန်ကြာလာသည်နှင့်အမျှ အသားအရေကိုသိသိသာသာပျက်စီးလာစေနိုင်ပြီး အရေးအကြောင်းများ၊ ပါးရေနားရေများ၊ အသားအရောင်မည်းညစ်လာခြင်း အစရှိသည့် အရွယ်မတိုင်ခင်အိုမင်းရင့်ရော်ခြင်း၏ လက္ခဏာအမျိုးမျိုးကိုဖြစ်ပေါ်လာစေနိုင်ပါတယ်။ သို့သော်လည်း ညဖက်အချိန်များတွင် သင့်အသားအရေနှင့်ဆံသားကို ဂရုစိုက်ပေးခြင်းဖြင့် ထိုလက္ခဏာများကို ပျောက်ကင်းစေနိုင်ပါတယ်။

ညတိုင်းညတိုင်း အသားအရေကိုမိနစ်အနည်းငယ်ခန့်ပေးပြီး ဂရုစိုက်လိုက်ခြင်းဖြင့် ရက်အနည်းငယ်အတွင်း ပျစ်မျိုးမှဲ့မထင်အလှကိုပိုင်ဆိုင်နိုင်မှာဖြစ်ပါတယ်။ ထို့ကြောင့် ညစဉ်အမြဲ လိုက်နာပြုလုပ်ပေးရမည့် အလေ့အကျင့် (၁၀) မျိုးကို ဖော်ပြပေးလိုက်ရပါတယ်။

၁။ မိတ်ကပ်ဖျက်ပါ။

ညဖက်အိပ်နေသည့်အချိန် အသားအရေရှိချွေးပေါက်များပွင့်ဟလာသည့်အတွက် မိတ်ကပ်များရှိနေပါက ချွေးပေါက်ပိတ်သွားနိုင်ပါတယ်။ ထိုမှတဆင့် အစက်အပြောက်များ၊ အသားအရေမညီညာမှုများ၊ ဝက်ခြံများ စသည်တို့ကို ဖြစ်ပေါ်လာစေနိုင်ပါတယ်။ ထို့ကြောင့် အလုပ်မည်မျှပင်များနေသည်ဖြစ်စေ၊ မလှုပ်နိုင်လောက်အောင်မောပန်းနွမ်းနယ်နေသည်ဖြစ်စေ ညဖက်အိပ်ရာမဝင်ခင် အချိန်ယူ၍မိတ်ကပ်ဖျက်ပေးပါ။

၂။ Toner အသုံးပြုပါ။

သင့်အသားအရေ၏ နဂိုမူလ pH Levels တို့ကို ပြန်လည်ထိန်းသိမ်းပေးရန်အတွက်သာမက ဖုန်မှုန့်များ၊ အညစ်အကြေးများကို သန့်ရှင်းရန်အတွက်လည်း ကူညီပေးမှာဖြစ်ပါတယ်။ အဆီပြန်တတ်သူများ၊ ဝက်ခြံထွက်တတ်သူများ အထူးသင့်တော်ပြီး ညတိုင်းအိပ်ရာမဝင်ခင် အသုံးပြုပေးရမှာဖြစ်ပါတယ်။

၃။ Hand Cream လိမ်းခြယ်ပါ။

ရေနွေး၊ ဆပ်ပြာတို့ဖြင့် လက်ကိုသေချာပြောင်စင်အောင်ဆေးကြောပြီးနောက် တဘက်ဖြင့်သုတ်ပေးကာ hand cream ကို လိမ်းပေးပါ။ ထိုသို့ပြုလုပ်ပေးခြင်းက သင့်လက်သည်းနှင့် လက်တို့ကို မနက်အချိန်တွင် အလှပဆုံးဖြစ်နေစေမှာပါ။

၄။ Eye Cream သုံးပေးပါ။

ရေဓာတ်ဖြည့်တင်းပေးခြင်း၊ မျက်ကွင်းညိုမှုကိုသက်သာစေခြင်း၊ အရေးအကြောင်းများကိုလျော့ချပေးခြင်း စသည့်ကောင်းကျိုုးများကို ပေးစွမ်းနိုင်သည့်အတွက် အိပ်ရာသို့မဝင်မှီ မိတ်ကပ်ပြောင်စင်အောင်ဖျက်ပြီးနောက် Eye Cream ကို လိမ်းပေးနိုင်ပါတယ်။

၅။ သွားတိုက်ပါ။

ညစာစားပြီးနောက် အိပ်ရာသို့မဝင်ခင် သွားတိုက်ပေးခြင်းသည် သင့်အာခံတွင်းကို ရောဂါပိုးများ၊ ကလိုင်အပေါက်များ ဖြစ်ပေါ်ခြင်းကို ကာကွယ်ဟန့်တားပေးသောကြောင့် မနက်အိပ်ရာမှနိုးသည့်အချိန် ခံတွင်းနံ့ဆိုးရွားမှုကို သက်သာစေမှာဖြစ်ပါတယ်။

၆။ ခြေထောက်ပေါ်သို့ ရေနံဂျယ်လီသုတ်လိမ်းပေးပါ။

ရေနွေးဖြင့်ခြေထောက်ကိုဆေးကြောပြီးနောက် သေချာပြောင်စင်အောင်သုတ်ပေးပါ။ ခြေဖဝါးကွဲအက်ခြင်းမှ ကာကွယ်ရန်အတွက် ခြေထောက်၏ကြမ်းတမ်းသော၊ ခြောက်သွေ့သောနေရာသို့ ရေနံဂျယ်လီ သို့မဟုတ် Feet Cream ကိုသုတ်လိမ်းပေးပြီးနောက် ခြေအိတ်စွပ်ကာအိပ်ရာသို့ဝင်နိုင်ပါပြီ။

၇။ ဆံပင်စည်းပါ။

ဆံပင်တွင်ပါဝင်သည့် အဆီနှင့်အညစ်အကြေးများသည် မျက်နှာပေါ်သို့ရောက်သည့်အခါ တင်းတိပ်ဝက်ခြံများကို ဖြစ်ပေါ်လာစေနိုင်သည့်အတွက် အိပ်ရာဝင်သည့်အခါ ဆံပင်ရှုပ်ထွေးမှုမရှိစေရန် ကျစ်ဆံမြီး သို့မဟုတ် ဆံထုံးပုံစံပြုလုပ်ပြီး အိပ်ပါဟု အကြံပြုချင်ပါတယ်။

၈။ စိုထိုင်းမှုထိန်းသိမ်းစက်ကိုဖွင့်ပါ။

စိုထိုင်းမှုထိန်းသိမ်းစက်သည် အခန်းအတွင်းရှိလေကို အစိုဓာတ်ဖြင့်ဖုံးလွှမ်းပေးသည့်အတွက် ခြောက်သွေ့၊ ယားယံပြီး ကွဲအက်သောအသားအရေတို့ကို သက်သာစေမှာဖြစ်ပါတယ်။ ဆောင်းရာသီအတွင်း အသုံးပြုရန်အထူးသင့်တော်ပါတယ်။

၉။ ပိုးထည်ခေါင်းအုံးစွပ်များကို ပြောင်းလဲအသုံးပြုပါ။

ပိုးမျှင်တွင် ပရိုတင်းနှင့် အမီနိုအက်စစ် ၁၈ မျိုးပါဝင်သည့်အတွက် အသားအရေသာမက ဆံကေသာကိုပါ နုပျိုလှပစေရန်ကူညီပေးမှာဖြစ်ပါတယ်။ ချည်သားခေါင်းအုံးစွပ်များတွင် အိပ်စက်သည့်အခါ မျက်နှာပေါ်တွင် ဖြစ်ပေါ်တတ်သည့် အရာထင်ခြင်းများကိုလည်း သက်သာစေမှာဖြစ်ပါတယ်။

၁၀။ အိပ်ရေး၀၀အိပ်ပါ။

သင်အိပ်စက်သည့်ပုံစံနှင့် အိပ်ချိန်အတိုင်းအတာသည် နေ့အချိန်အတွင်း သင့်အသွင်အပြင်အပေါ် သက်ရောက်မှုအလွန်ရှိနိုင်သဖြင့် နှစ်ခြိုက်စွာအိပ်ပျော်ရန်အတွက် အိပ်ချိန်မှန်ခြင်း၊ တီဗွီမကြည့်ခြင်း၊ လက်ကိုင်ဖုန်းကိုဝေးဝေးထားခြင်း၊ အိပ်ခါနီးအချိန်ကော်ဖီမသောက်သုံးခြင်း၊ ညနေခင်းအချိန်တွင် ရေနွေးဖြင့်ရေချိုးခြင်း စသည့်လုပ်ငန်းဆောင်တာများကို လုပ်ဆောင်ပေးနိုင်ပါတယ်။