ခန္ဓာကိုယ်အစိတ်အပိုင်းအားလုံးအတွက် ထိထိရောက်ရောက်ဝိတ်ကျစေမယ့် လေ့ကျင့်ခန်း (၆) မျိုး

ပျိုမေတို့အားလုံးပဲမင်္ဂလာပါနော်။ လေ့ကျင့်ခန်းစလုပ်ပြီး ဝိတ်ချဖို့စဉ်းစားနေတဲ့ ပျိုမေတို့အတွက် ဒီတစ်ခေါက်မှာ လက်မောင်း၊ ဝမ်းဗိုက်၊ ခါး၊ ပေါင်တံစတဲ့ တစ်ကိုယ်လုံးအတွက် ထိထိရောက်ရောက် အဆီလောင်ကျွမ်းစေမယ့် လေ့ကျင့်ခန်း (၆) မျိုးကိုဖော်ပြပေးချင်ပါတယ်။ Gym သွားစရာမလိုဘဲ ကိုယ့်အိမ်မှာပဲပြုလုပ်နိုင်တဲ့လေ့ကျင့်ခန်းတွေဖြစ်တာမို့ ဝိတ်ကျချင်သူတွေ၊ လက်ရှိကိုယ်အလေးချိန်ကို ထိန်းထားချင်သူတွေအတွက် အမြဲကျစ်လျစ်သွယ်လျနေစေဖို့ ကူညီပေးပါလိမ့်မယ်။

၁။ Burpees

ဒိုက်ထိုးပြီးခပ်မြန်မြန်ပြန်ထရတဲ့ Burpees လေ့ကျင့်ခန်းက သင့်တစ်ကိုယ်လုံးက အဆီတွေကျစေပြီး ကယ်လိုရီများများလောင်ကျွမ်းစေတဲ့အပြင် ကြွက်သားလည်းတက်စေတဲ့ လေ့ကျင့်ခန်းဖြစ်ပါတယ်။ ချွေးထွက်လွယ်စေတဲ့ လေ့ကျင့်ခန်းဖြစ်တာကြောင့် ကျန်းမာရေးလည်းကောင်းပါတယ်။ အစပိုင်းမှာ အချိန်ကြာကြာလုပ်ဖို့ ခက်ခဲနိုင်တာကြောင့် ၂၀ စက္ကန့်လောက် နားချိန်ယူပြီး တစ်မိနစ် နှစ်ခေါက်ပြုလုပ်ပေးပါ။ ကျင့်သားရသွားတဲ့အခါ ၁၀ မိနစ်အထိပြုလုပ်ပေးမယ်ဆိုရင် သိသာတဲ့ရလဒ်ကိုအမြန်ဆုံးရရှိစေမှာပါ။

၂။ Planks

Plank ထောက်တာက ဝမ်းဗိုက်အဆီကို ထိထိရောက်ရောက်ကျစေပါတယ်။ အချိန်ကြာကြာ လုပ်နိုင်လေလေ ကိုယ်အလေးချိန်ကိုပါကျစေတာကြောင့် အလေ့အကျင့်ရအောင် ပုံမှန် Plank ထောက်ပေးပါ။ လုပ်နေကျ Plank ပုံစံအပြင် လက်တစ်ဖက်ကို ဘေးဘက်ထောက်ပြီး ခြေထောက်အပေါ်မြှောက်ကာ Side Plank ပုံစံမျိုးလည်း ပြုလုပ်ပေးနိုင်ပါတယ်။

၃။ Push-ups

ဒိုက်ထိုးခြင်းလေ့ကျင့်ခန်းကလည်း လက်မောင်း၊ ပုခုံးနဲ့ ဝမ်းဗိုက်ကြွက်သားတည်ဆောက်မှုကောင်းစေပြီး အချိန်တိုအတွင်း တစ်ကိုယ်လုံးအဆီကျစေတဲ့ လေ့ကျင့်ခန်းတစ်ခုဖြစ်ပါတယ်။ အလေ့အကျင့်ရှိဖို့လိုပြီး ပုံမှန်ပြုလုပ်ပေးမယ်ဆိုရင် ကျစ်လျစ်တဲ့ခန္ဓာကိုယ်ကိုထိန်းထားနိုင်ဖို့ကူညီပေးပါလိမ့်မယ်။

၄။ Skipping (ကြိုးခုန်ခြင်း)

ကြိုးခုန်တာကလည်း လုပ်ရလွယ်ပြီး ဝိတ်ကျစေတဲ့လေ့ကျင့်ခန်းနည်းတစ်မျိုးဖြစ်ပြီး တစ်နေ့ အခါ တစ်ထောင်လောက်ခုန်မယ်ဆိုရင် ကယ်လိုရီ ၁၄၀ ကနေ ၁၉၀ ကြားအထိ လောင်ကျွမ်းစေပါလိမ့်မယ်။

၅။ Side-Lunges And Squats

တင်ပါးကော့ပြီး ဒူးကွေးထိုင်ချပေးရတဲ့ Squat လေ့ကျင့်ခန်းနဲ့ ပုံပါအတိုင်း ခြေထောက်တစ်ဖက်ကွေးကာ နောက်တစ်ဖက်ကိုဘေးကားပေးရတဲ့ Side-Lunges လေ့ကျင့်ခန်းတွေက ကိုယ်ခန္ဓာအောက်ပိုင်း ပေါင်၊ တင်ပါးနဲ့ ခြေသလုံးစတဲ့နေရာတွေကို သိသိသာသာအဆီကျပြီး ကျစ်လျစ်လာစေပါတယ်။ ထိရောက်တဲ့ရလဒ်အတွက် Side-Lunges ကို ခြေထောက်တစ်ဖက်ချင်းအတွက် ၂၅ ခေါက်စီနဲ့ Squat ကိုတော့ ၁၀ ကြိမ် နှစ်ကြော့ ပြုလုပ်ပေးသင့်ပါတယ်။

၆။ Yoga Stretches

လေ့ကျင့်ခန်းလုပ်ပြီးနောက်မှာ ယောဂပိုစ့်အချို့ပြုလုပ်ပြီး အကြောလျှော့ပေးတာကလည်း ကယ်လိုရီပိုလောင်ကျွမ်းစေပြီး ပြင်းထန်တဲ့လေ့ကျင့်ခန်းတွေကြောင့် ခန္ဓာကိုယ်ကိုက်ခဲတာနဲ့ ရောင်ရမ်းတာတွေမဖြစ်အောင် ကာကွယ်ပေးနိုင်ပါတယ်။ ဒါကြောင့် လေ့ကျင့်ခန်းလုပ်ပြီးတိုင်း လွယ်ကူတဲ့ အကြောလျှော့ ယောဂလေ့ကျင့်ခန်းတွေကိုပြုလုပ်ပေးဖို့မမေ့ပါနဲ့နော်။