ဝက်ခြံဆိုတာ မျက်နှာအရေပြားပေါ်မှာ ကြည့်ရဆိုးပြီး ဆွဲဆောင်မှု လျော့ကျစေတဲ့ အဆိုးဆုံး အရာတွေပါ။ ဒါကြောင့် ဒီတစ်ခေါက်မှာတော့ မျက်နှာပေါ်က ဝက်ခြံတွေနဲ့ ရောင်ရမ်းမှုတွေကို အပြီးတိုင် ရှင်းထုတ်ပေးနိုင်မယ့် အထိရောက်ဆုံး DIY Face Masks ၃ ခု ပြုလုပ်နည်းလေးတွေကို ပြောပြပေးချင်ပါတယ်။
(၁) နနွင်းနဲ့ ပျားရည် Mask
နနွင်းနဲ့ ပျားရည် အရောအစပ်ဟာ မျက်နှာ အရေပြားပေါ်က ဝက်ခြံနဲ့ ရောင်ရမ်းမှုတွေကို လျော့ကျသက်သာ စေမယ့် အထိရောက်ဆုံး အိမ်တွင်း ကုထုံးတစ်ခု ဖြစ်ပါတယ်။
ပြုလုပ်နည်းကတော့ အရမ်းကို လွယ်ကူ ရိုးရှင်းပါတယ်။ ပထမဦးဆုံး အနေနဲ့ သန့်စင်တဲ့ ပန်းကန်လုံး တစ်ခုထဲမှာ နနွင်း စားပွဲတင် ဇွန်း ၁ ဇွန်းနဲ့ တဝက်ခန့် ၊ ပျားရည် ၁ ဇွန်း တို့ကို ရောထည့်ပြီး သမအောင်မွှေပေးပါ။
ထို့နောက် မျက်နှာလိမ်းတဲ့ Brush နဲ့ မျက်နှာ အရေပြားအနှံ့ အရမ်းမထူ အရမ်းလည်းမပါးပဲ အတော်နေ လိမ်းကျံပြီး ၁၀ မိနစ်ကနေ ၁၅ မိနစ်ခန့် ထားလိုက်ပါ။
ပြီးရင်တော့ ရေခပ်နွေးနွေးနဲ့ မျက်နှာသစ်လိုက်လို့ ရပါပြီ။ လွယ်ကူရိုးရှင်းပြီး ဝက်ခြံနဲ့ ရောင်ရမ်းမှုတွေကို သက်သာစေမယ့်အပြင် မျက်နှာအသားအရေကို သဘာဝအတိုင်း နူးညံ့ချောမွှေ့ လာစေမှာ ဖြစ်ပါတယ်။
(၂) ရှားစောင်းလက်ပတ်နဲ့ Tea Tree Oil Mask
Tea Tree Oil ဟာ ဘက်တီးရီးယားတွေကို တိုက်ထုတ်နိုင်တဲ့ ဂုဏ်သတ္တိတွေ ပါဝင်တာကြောင့် ဝက်ခြံတွေကို နှိမ်နင်းနိုင်တဲ့ အကောင်းဆုံး အဆီတစ်မျိုး ဖြစ်ပါတယ်။
ရှားစောင်းလက်ပတ် ဂျယ် စားပွဲတင် ဇွန်း ၂ ဇွန်း ၊ Tea Tree Oil ၂ စက်နဲ့ ကြက်ဥ အကာ ၁ လုံး တို့ လိုအပ်ပါတယ်။
အရင်ဆုံး ပန်းကန်လုံး တစ်ခုထဲမှာ ကြက်ဥ အကာကိုထည့်ပြီး အမြုပ်ထလာတဲ့အထိ ခေါက်ပေးရပါမယ်။ ထို့နောက် ရှားစောင်းလက်ပတ် ဂျယ်နဲ့ Tea Tree Oil တို့ကို ရောထည့်ပြီး သမအောင် မွှေပေးပါ။
ပြီးရင် ရလာတဲ့ ကြက်ဥ အကာ ၊ ရှားစောင်းလက်ပတ် ဂျယ် နဲ့ Tea Tree Oil အနှစ်ကို လက်ချောင်းထိပ် သို့မဟုတ် မျက်နှာလိမ်းတဲ့ Brush ကို အသုံးပြုပြီး မျက်နှာ အရေပြားအနှံ့ လိမ်းကျံကာ အချိန် ၁၀ မိနစ်ကနေ ၁၅ မိနစ်ခန့် ထားလိုက်ပါ။
ပြီးရင်တော့ ရေအေးနဲ့ မျက်နှာသစ် လိုက်လို့ရပါပြီ။ မျက်နှာပေါ်က ဝက်ခြံ နဲ့ ရောင်ရမ်းမှုတွေကို သက်သာစေမယ့်အပြင် Tea Tree Oil က ချွေးပေါက် အတွင်းပိုင်းမှာရှိတဲ့ ဘက်တီးရီးယားတွေကိုလည်း ရှင်းထုတ်ပေးမှာ ဖြစ်ပါတယ်။
(၃) မုန့်ဖုတ်ဆိုဒါနဲ့ ပျားရည် Mask
ရောင်ရမ်းမှုကို ဆန့်ကျင်တဲ့ မုန့်ဖုတ်ဆိုဒါ နဲ့ ပျားရည် ၊ သံပုရာသီး တို့ ပေါင်းစပ်ထားတဲ့ Mask ကတော့ မျက်နှာ အရေပြားပေါ်က ဝက်ခြံတွေကို အထိရောက်ဆုံး ရှင်းထုတ်ပေးနိုင်မယ့် လွယ်ကူရိုးရှင်းတဲ့ DIY Face Mask တစ်ခု ဖြစ်ပါတယ်။
ပန်းကန်လုံး တစ်ခုထဲမှာ မုန့်ဖုတ်ဆိုဒါ စားပွဲ တင်ဇွန်း ၁ ဇွန်း ၊ ပျားရည် ၁ ဇွန်း နဲ့ သံပုရာရည် ၁ ဇွန်းတို့ကို ရောထည့်ပြီး နှံ့အောင် မွှေပေးပါ။
မွှေထားတဲ့ အနှစ်ကို မျက်နှာလိမ်းတဲ့ Brush အသုံးပြုပြီး မျက်နှာနဲ့ လည်ပင်အရေပြား အနှံ့ သေချာစွာ သုတ်လိမ်းပေးပါ။
သံပုရာရည်မှာ အက်စစ်ဓာတ် ပါတဲ့အတွက် မျက်လုံးတစ်ဝိုက် နေရာတွေကိုတော့ ရှောင်လိမ်း ပေးရမှာ ဖြစ်ပါတယ်။ ထို့နောက် ၁၅ မိနစ်ခန့်ထားပြီးရင်တော့ ရေခပ်နွေးနွေးနဲ့ မျက်နှာသစ်လိုက်လို့ ရပါပြီ။
မုန့်ဖုတ်ဆိုဒါနဲ့ ပျားရည် Mask ကို ညခင်းပိုင်းမှာ အသုံးပြုတာပိုပြီး သင့်တော်ပါတယ်။ နောက်တစ်ရက် အပြင်ထွက်မယ်ဆိုရင်တော့ နေရောင်ကာ ခရင်မ်ကို မဖြစ်မနေ လိမ်းဖို့ အကြံပြုချင်ပါတယ်။
