မျက်တောင်ရှည်ရှည်ကော့ကော့လေးရဖို့ မျက်တောင်တု Individual Lashes တွေကို ဘယ်လိုတပ်မလဲ

သင်က မျက်တောင်တုတပ်တာကို မမြင်စေချင်ဘဲ သဘာဝဆန်ဆန် အစစ်လို ဖြစ်စေချင်ရင်တော့ သီးသန့် လာတဲ့ Individual Lashes တွေက သင့်တော်ပါတယ်။ Individual Lashes တွေကို သပ်သပ်ဝယ်နိုင်သလို ကိုယ့်မှာ ရှိပြီးသား မျက်တောင်တုတွေကို ညှပ်ပြီး သုံးနိုင်ပါတယ်။ ဒီတော့ တစ်ဝက်ချင်းဆီ မျက်တောင် ဘယ်လိုခွဲတပ်မလဲ ကြည့်လိုက်ရအောင်-

ပထမဆုံး Individual Lashes တပ်ဖို့ လိုအပ်တဲ့ ပစ္စည်းတွေကတော့

Individual Lashes, Eyelash Glue ကိုမှ အနက်ရောင်၊ Eyelash Curler, Tweezer နဲ့ မျက်တောင်ကော့ဆေး၊ Eyeliner တို့ပါ။

Photo Source: BlacklashMakeup Design

နောက်တစ်ဆင့်အနေနဲ့ ဘယ်လို ပုံစံ False Lashes ကို ရွေးချယ်မလဲ စဉ်းစားသင့်ပါတယ်။ ရှည်တဲ့ False Lashes တွေက သဘာဝ သိပ်မဆန်ဘဲ ထူးခြားတဲ့ မျက်ဝန်းကို ရစေနိုင်ပါတယ်။ ဒီတော့ သဘာဝဆန်ဆန် လှချင်သူတွေအနေနဲ့ False Lashes တိုတာကို သုံးသင့်ပါတယ်။ သင်က နဂိုတည်းက မျက်တောင်ရှည်သူ ဆိုရင် အလယ်အလတ် ရှည်တဲ့ False Lashes ကို သုံးနိုင်ပါတယ်။

ထပ်လုပ်ပေးရမှာက Eyeliner ဆွဲပေးရမှာပါ။ ဘာကြောင့် Eyeliner ဆွဲသင့်တာလဲဆိုတော့ နဂို မျက်တောင်နဲ့ မျက်တောင်တု တစ်ထပ်တည်း ကျသွားအောင်လို့ပါ။

Eyeliner ဆွဲပြီးရင်တော့ မျက်တောင်ကော့ပေးရပါမယ်။ Eyelash Curler ကို Dryer နဲ့ အပူပေးကာ ကော့ပြီးနောက် Mascara နဲ့ ထပ်ကော့ပေးရပါမယ်။

ဒီအဆင့်ကတော့ မျက်တောင်တု တပ်ရမယ့် အဆင့်ပါ။ Eyelash Glue ကို လက်ခုံမှာ တင်ပေးရပါမယ်။ ပြီးရင်တော့ Tweezer နဲ့ False Lashes ကို ယူကာ ကော်နဲ့ လူးပေးရပါမယ်။ အနည်းငယ် ခြောက်သွားအောင် စောင့်ပြီးနောက် မှန်ကို သင့်မေးစေ့အောက်မှာ ထားကာ မျက်တောင်တုကို မျက်လုံး Line နဂိုမျက်တောင်နဲ့ အနီးစပ်ဆုံးကနေ တပ်ပေးရပါမယ်။