ဘယ်အရာမဆို ကိုုယ်တိုင် ဖန်တီးကြည့်ရင် ပျော်ဖို့ကောင်းသလို ပိုလည်း စိတ်ချစရာပါပဲ။ ဥပမာ- ဟင်းချက်ရင်တောင် ကိုယ်တိုင်ချက်ရင် အထဲက ဘာတွေ ပါလဲ ပိုသိတာမို့ ပိုစိတ်ချရသလို ပိုလည်း ဂုဏ်ယူစရာ ဖြစ်တတ်ပါတယ်။ ကိုယ်တိုင် လုပ်နိုင်တဲ့အထဲ အသားအရေအတွက် DIY Mask, DIY Serum တွေလည်း ပါဝင်ပါတယ်။
ဒီတစ်ခေါက်မှာတော့ သင်က အိမ်မှာ နေရင်း အပျင်းပြေ Glow Serum ဖန်တီးချင်တာပဲဖြစ်ဖြစ် ဒါမှမဟုတ် Serum ကုန်နေလို့ ခဏတဖြုတ် လိမ်းချင်လို့ပဲ ဖြစ်ဖြစ် Serum လုပ်ကြည့်ချင်သူတွေအတွက် ဖော်ပြပါရစေ။ ဒီ Glow Serum ကို အိမ်မှာ ပြုလုပ်နိုင်တာ ဖြစ်ပြီး ပုံမှန်လိမ်းပေးမယ် ဆိုရင် မျက်နှာအသားအရေ ပိုတောက်ပကာ ပိုကြည်လင်စိုပြေလာပါလိမ့်မယ်။ ဒါ့အပြင် ဒီ Glow Serum ပြုလုပ်ဖို့အတွက် လိုအပ်တဲ့ ပစ္စည်းတွေက အလွယ်တကူ ရနိုင်တာမို့ ပျိုမေတို့အတွက် အဆင်ပြေမှာပါ။ Glow Serum ပြုလုပ်ပုံ နည်းလမ်းကတော့-
သန့်ရှင်းတဲ့ ခွက်တစ်ခွက်ထဲကို Aloe Vera Gel ရှားစောင်းလတ်ပတ်ဂျယ် တစ်ဇွန်း ထည့်ရပါမယ်။ ရှားစောင်းလတ်ပတ်က အသားအရေကို ရေဓာတ်ဖြည့်ပေးကာ စိုပြေတင်းရင်းစေပါတယ်။
ပြီးရင်တော့ ဒီ ရှားစောင်းလတ်ပတ်ထဲကို Rosehip Oil တစ်ဇွန်းထည့်ရပါမယ်။ Rosehip Oil ရဲ့ အသားအရေအတွက် ကောင်းကျိုးတွေကတော့- အသားအရေကို လန်းဆန်းစေကာ ဆဲလ်သစ်တွေကို ပြန်လည် ဖြစ်စေပါတယ်။ ဒါ့အပြင် Rosehip Oil က အသားအရေ ပျက်စီးခြင်းကိုလည်း ကာကွယ်ပေးပါတယ်။
ဒီ ရှားစောင်းလတ်ပတ်နဲ့ Rosehip Oil ကို ရောမွှေပေးရပါမယ်။ နောက်ဆုံးထည့်ပေးရမယ့် အရည်ကတော့ နှင်းဆီရည် Rose Water ပါ။ Rose Water ကို ဒီထဲမှာ လေးပုံပုံရင် တစ်ပုံထည့်ပေးရပါမယ်။
ရလာတဲ့ အရောကို Serum ထုတ်လို့ရမယ့် Dropper Bottle အလွတ်ထဲ ထည့်ရပါမယ်။ ဒါဆိုရင်တော့ သင်လိုချင်တဲ့ Glow Serum ကို ရပါပြီ။ Glow Serum ကို မျက်နှာပေါ် စိမ့်ဝင်တဲ့အထိ လိမ်းပေးရပါမယ်။ ပြီးနောက် ငြင်သာစွာ နှိပ်နယ်ပေးရပါမယ်။
ဒီ Glow Serum ကို ပုံမှန်သုံးမယ်ဆိုရင် သင့်အသားအရေ ပိုနူးညံ့ချောမွေ့ကာ စိုပြေတောက်ပလာပါလိမ့်မယ်။
Photo Source: Pinterest
By MyStyle Myanmar
