သင့်ကိုယ်သင် လက်ထပ်ဖို့ အဆင်သင့်ဖြစ် မဖြစ် သံသယဖြစ်နေလား။ အမေရိကန်ပြည်ထောင်စုမှာ လက်ထပ်ပြီး အိမ်ထောင်သည်တွေ ၄၀ % ကနေ ၅၀ % ကြား ကွာရှင်းတတ်ကြပါတယ်။

သင့်ချစ်သူကို Yes I do လို့ ခေါင်းမညိတ်ခင်မှာ ကိုယ့်ကိုကိုယ် လက်ထပ်ဖို့ အဆင်သင့်ဖြစ်နေပြီလားဆိုတာ အရင်ဆန်းစစ်သင့်ပါတယ်။ ဒါဆိုရင်တော့ စာဖတ်သူတို့အတွက် လက်ထပ်ဖို့ အဆင်သင့်ဖြစ်နေတဲ့ လက္ခဏာရပ်တွေကို မျှဝေပေးလိုက်ပါတယ်။

သင်အမှန်တကယ်လက်ထပ်ချင်တယ်။

မိဘတွေ အသိုင်းအဝိုင်တွေ သူငယ်ချင်းမိတ်ဆွေတွေရဲ့ ဖိအားတွေမပါဘဲ သူ့ကို လက်ထပ်ချင်တယ်၊ သူနဲ့ အမှန်တကယ်လက်ထပ်ချင်စိတ်ရှိတယ်တာဟာ သင်သူ့ကို လက်ထပ်ဖို့ အဆင်သင့်ဖြစ်နေတဲ့ လက္ခဏာရပ်တစ်ခုပါပဲ။ လက်ထပ်တယ်ဆိုတာ သင်ကိုယ်တိုင်ပဲ ဆုံးဖြတ်ရမှာပါ။

သင့်ချစ်သူနဲ့ လက်ထပ်ချင်တယ်ဆိုတဲ့ အပေါ် သံသယမရှိဘူး။

သင့်ချစ်သူနဲ့ အမှန်တကယ်လက်ထပ်ဖို့အဆင်သင့်ဖြစ်နေတယ်ဆိုရင် သင့်ချစ်သူနဲ့ လက်ထပ်တဲ့အပေါ် သင်သံသယရှိမှာမဟုတ်ပါဘူး။ သင်နဲ့လက်ထပ်လိုက်ရင်သူတစ်ခုခုပြောင်းလဲသွားမယ်လို့ သင်မျှော်လင့်မှာမဟုတ်ဘဲ သူ့ကို အရှိအတိုင်းသင်လက်ခံနိုင်မှာဖြစ်ပါတယ်။ မျှော်လင့်ချက်တွေ များများထားပြီး စိုးရိမ် သံသယတွေဖြစ်နေတာဟာ သင်တို့နှစ်ယောက်လက်ထပ်ပြီးရင် ကွာရှင်းရနိုင်ချေရှိပါတယ်။

သူပေးတဲ့ ကတိတွေကို အပြည့်အဝယုံတယ်။

တစ်ယောက်ကိုယ်တစ်ယောက် နားလည်မှုအပြည့်နဲ့ ယုံကြည်ဖို့အရေးကြီးပါတယ်။ လူနှစ်ယောက်လက်ထပ်တာဟာ အချစ်တစ်ခုနဲ့ မပြီးပါဘူး။

သင်တို့နှစ်ယောက်ဆက်ဆံရေး ပျက်မှာစိတ်ပူစရာမလိုဘဲ သင့်ချစ်သူနဲ့သင် အငြင်းအခုန်လုပ်နိုင်တယ်။

ချစ်သူနှစ်ဦးကြားမှာ တခါတလေ သဘောထားမတိုက်ဆိုင်တဲ့အချိန်ဆိုတာရှိပါတယ်။ အဲဒီအခါ သင်က သူသင့်ကိုစိတ်ခုသွားမလားဆိုတာကို စိုးရိမ်စရာမလိုဘဲ သူနဲ့ ပွင့်ပွင့်လင်းလင်း ငြင်းခုန်ကြတယ်။ ပြီးရင် ဖြေရှင်းကြတယ်။

ပွင့်လင်းတဲ့ဆက်ဆံရေးရှိတယ်။

သူ့ကို အရာအားလုံး ပွင့်ပွင့်လင်းလင်းတိုင်ပင်လို့ရတယ်။ ကိစ္စကြီးတာ သေးတာကအစ သူ့ကို ပြောလို့ရတယ်။ သင်တို့နှစ်ယောက်ကြားမှာ ဘမှကန့်သတ်ထားတာမျိုးမရှိဘူးဆိုရင် လက်ထပ်ဖို့ အဆင်သင့်ဖြစ်နေတဲ့ လက္ခဏာတစ်ခုပါပဲ။

ငွေကြေးကိစ္စတွေ တိုင်ပင်ဆွေးနွေးကြတယ်။

သင့်ချစ်သူနဲ့ ငွေရေးကြေးရေးကိစ္စတွေ ပြောဖြစ်ကြတယ်။ တိုင်ပင်ကြတယ်ဆိုတာဟာ သိပ်ကိုကောင်းတဲ့အချက်ပါ။ သူ့ဝင်ငွေ ကိုယ့်ဝင်ငွေချိန်ဆပြီး ငွေးကြေးစီမံနိုင်မှ အိမ်ထောင်ရေး သာယာအဆင်ပြေမယ်လေ။

သင့်တို့နှစ်ယောက် တစ်ဦးကိုတစ်ဦးရိုးသားကြတယ်။

တစ်ဦးအပေါ်တစ်ဦး မရိုးသားတာ လုံးဝမလုပ်ဘဲ ရိုသားကြတယ်ဆိုရင် သင်တို့နှစ်ယောက် လက်ထပ်ဖို့ အဆင်သင့်ဖြစ်နေတဲ့ လက္ခဏာရပ်တစ်ခုပါပဲ။

အနာဂတ်အတွက် အစီစဉ်တွေရှိတယ်။

အနာဂတ်အတွက် နှစ်ယောက်သားအတူတူ လုပ်ဆောင်မယ့် အစီစဉ်တွေရှိတယ်။ ကလေးဘယ်နှစ်ယောက်ယူမယ်၊ ဘယ်လိုနေရာမှာနေမယ်ဆိုတာကအစ အစီစဉ်ဆွဲထားတယ်။

တစ်ယောက်ကိုတစ်ယောက်ချစ်ပြီး အပြန်အလှန်လေးစားတယ်။

သင်တို့နှစ်ယောက်ဟာ တစ်ယောက်ကိုယ်တစ်ယောက်ချစ်ရုံသာမက အပြန်အလှန်လေးစားမှုလည်းရှိရပါမယ်။ ဒါမှသာလျှင်နှစ်ဦးသား နားလည်မှုတွေ မေတ္တာတွေနဲ့ ရှေ့ဆက်နိုင်မှာပါ။

သူ့ကိုလက်ထပ်တာဟာ အမှန်ဆုံးဆုံးဖြတ်ချက်ဖြစ်တယ်လို့ သင်ယုံကြည်တယ်။

လက်ထပ်ဖို့အဆင်သင့်ဖြစ်နေပြီဆိုတဲ့ လက္ခဏာရပ်ထဲမှာ အခုတစ်ချက်လည်းအပါအဝင်ပါပဲ။ သူနဲ့လက်ထပ်ပြီး ဖြစ်လာမယ့် အဆိုးအကာင်းတွေကို ရင်ဆိုင်ဖို့ သတ္တိရှိတယ်။ နောင်တမရဘူး။ မှန်ကန်ဆုံးဆုံးဖြတ်ချက်လို့ ယုံကြည်နေတာဖြစ်ပါတယ်။

အခုဖော်ပြလိုက်တဲ့အချက်တွေက လက်ထပ်ဖို့ အဆင်သင့်ဖြစ်နေတဲ့ ချစ်သူတို့ရဲ့ လက္ခဏာရပ်တစ်ချို့ပဲဖြစ်ပါတယ်။ ကဲ စာဖတ်သူတို့ကော လက်ထပ်ဖို့ အဆင်သင့်ဖြစ်နေပြီလား။