စာဖတ်သူတို့ ဘယ်လိုဖြေချင်ကြပါသလဲ။ ချစ်သူတစ်ယောက်တည်းထားပြီး ဒီတစ်ယောက်တည်းကိုပဲ အတည်လက်ထပ်ရမှာလား။ လက်ထပ်ဖို့လိုသလား။ အိမ်ထောင်ဖက် ရွေးချယ်ဆိုတာမှာ ဘယ်ပေတံနဲ့ တိုင်းပြီး ရွေးချယ်ဖို့ စဉ်းစားထားပါသလဲ။
ကျွန်မတို့ မြန်မာ့ယဉ်ကျေးမှုလို့ပဲ ဆိုရမှာပေါ့။ ရှေးယခင်ကတည်းက မိန်းကလေးဆိုတာ ဘယ်လိုဖြစ်ရမယ်။ မိန်းမကောင်း ပန်းကောင်းတစ်ပွင့်ပန် ဆိုတာမျိုးပေါ့။ ပွေပွေရှုပ်ရှုပ်လုပ်တာမကောင်းဘူးပေါ့။ စာရေးသူလည်း အခု စာဖတ်သူတို့ကို ပွေရမယ်။ ရှုပ်ရမယ်လို့ လည်း မဟုတ်ပြန်ပါဘူး။
မိန်းမကောင်း ပန်းကောင်းတစ်ပွင့်ပန်။ အင်းကောင်းတာပေါ့။ ဒါပေမယ့် ကိုယ်ပန်လိုက်တဲ့ပန်းက ပန်းကောင်းတစ်ပွင့်ဟုတ်မနေရင်ရော။ ပုပ်ပွနေတဲ့ပန်းဖြစ်နေရင်ကော၊ ပိုးကောင်တွေပါတဲ့ပန်းဖြစ်နေရင်ကော ဒီအတိုင်းပဲ ခံနေရတော့မှာလား ဆိုတာ စဉ်းစားစရာပါပဲ။
စာရေးသူအနေနဲ့ကတော့ စာဖတ်သူတို့ရဲ့ အိမ်ထောင်ဖက်ကို နှလုံးသားနဲ့ရော ဦးနှောက်နဲ့ရော စဉ်းစားစေချင်ပါတယ်။ ချစ်သူထားတာကြာပြီမို့လို့၊ သူနဲ့တွဲတာ ၁၀ နှစ်လောက်ရှိနေပြီ ယူမှရတော့မယ်ဆိုတာမျိုး မလုပ်မိပါစေနဲ့။ ချစ်သူထားတာ ဘာဖြစ်လဲကွယ်။ ဘာမှပဲ့ပါသွားတာမဟုတ်ဘူးလေ။ တော်ကြာ လက်ထပ်လိုက်ခါမှ အဆင်မပြေလို့ပါ။ မတော်လို့ပါနဲ့ ကွဲလိုက်ကွာလိုက်ဖြစ်တာဟာ ပိုပြီး အရှက်ရစရာပါ။
ဖိနပ်ဝယ်ရင်၊ အင်္ကျီအ၀တ်အစားဝယ်ရင်တောင် ဒါကိုတော့ ဘယ်သွားရင်ဝတ်မယ်။ ဘာဖိနပ်လေးနဲ့တွဲစီးလိုက်မယ်၊ ဈေးက ဘယ်လောက်ဆိုများတယ်။ စသဖြင့် စဉ်းစားချင့်ချိန်ပြီး ၀ယ်ယူကြတယ်မလား။ ကိုယ့်ရဲ့အိမ်ထောင်ဖက် အထူးသဖြင့် ကိုယ့်ရင်သွေးလေးရဲ့ ဖခင်ဖြစ်လာမယ့်သူကို ဒီထက်ပိုပြီး ရွေးချယ်သင့်တယ်လို့ ထင်ပါတယ်။
အခုခေတ်ကြီးမှာ ယူလိုက် ကွာလိုက်နဲ့ သိပ်ကိုလွယ်ကြတာပဲ။ ဘာဖြစ်လို့လဲ။ အဖြေကိုတော့ စာဖတ်သူတို့ပဲ အဖြေထုတ်ကြည့်လိုက်ပါနော်။
ချစ်သူကို လက်ထပ်မယ်မထပ်ဘူးဆိုတာ ဒီပေတံတွေနဲ့ တိုင်းလိုက်ရအောင်။
၁။ တစ်ယောက်ကိုယ်တစ်ယောက် အကြွင်းမဲ့ ယုံကြည်ကြပြီလား။
၂။ တစ်ယောက်နဲ့တစ်ယောက်ကြားမှာ ပွင့်ပွင့်လင်းလင်းရှိပြီး ဘာလျှို့ဝှက်ချက်မှ မရှိတာ သေချာပြီလား။
၃။ သူနဲ့သာအတူရှိရင် အခက်အခဲတွေပဲ ကြုံလာကြုံလာ အားလုံးကို ရင်ဆိုင်နိုင်မယ်လို့ ယုံကြည်ချက်ရှိလား။
၎။ သင်တို့နှစ်ယောက်မှာ တူညီတဲ့ အနာဂတ်ပန်းတိုင်တွေ ရှိကြပြီလား။ အနာဂတ်အတွက် အစီစဉ်တွေ ရှိပြီးပြီလား။
၅။ သူဟာ သင့်ဘ၀အတွက်မရှိမဖြစ်လိုအပ်တဲ့သူလား။
၆။ သင့်လက်ကျန်ဘ၀တစ်ခုလုံးကို သူနဲ့အတူ ဖြတ်ကျော်သွားနိုင်တယ်ဆိုတာ သေချာလား။
၇။ သူနဲ့အတူရှိရရင် ပျော်ရွှင်ရမယ်ဆိုတဲ့ယုံကြည်ချက်၊ သူ့ကို ပျော်ရွှင်အောင်လုပ်ပေးနိုင်မယ်ဆိုတဲ့ ယုံကြည်ချက်ရှိလား။
၈။ သူသင့်ကို ပြောင်းလဲဖို့မကြိုးစားဘဲ သင့်အရှိအတိုင်းကို သူချစ်တာလား။ သင်ကရော သူ့ကို ဘာမျှော်လင့်ချက်မှမပါဘဲ ချစ်တာသေချာလား။
၉။ သူဟာ ခင်ပွန်းကောင်းတစ်ယောက်၊ ဖခင်ကောင်းတစ်ယောက်ဖြစ်လာနိုင်မယ့်သူလား။ သင်ကရော ဇနီးကောင်းတစ်ယောက် မိခင်ကောင်းတစ်ယောက်ဖြစ်ဖို့ ယုံကြည်ချက်ရှိလား။
၁၀။ သင်တို့နှစ်ယောက်ဖက်က မိတ်ဆွေသူငယ်ချင်းတွေ၊ မိဘအသိုင်းအ၀ိုင်းတွေက ဘာပြောကြလဲ။
ဒါတွေကတော့ လက်ထပ်မယ့် ခင်ပွန်းလောင်းကို တိုင်းတာရမယ့် ပေတံတချို့ကို မျှဝေပေးလိုက်ပါတယ်။ စာဖတ်သူတို့အားလုံး အချစ်စစ်နဲ့ သာယာတဲ့ အိမ်ထောင်ရေးကို ထူထောင်နိုင်ကြပါစေ။
