အားလုံးပဲ မင်္ဂလာပါ၊ အသည်းကွဲရောဂါကို ဘယ်နှကြိမ်လောက် ခံစားဖူးကြပါသလဲ။ နှစ်ရှည်လများ တွဲလာတဲ့ ချစ်သူရည်းစားနဲ့ သဘောထားချင်း မတိုက်ဆိုင်တော့လို့၊ စရိုက်ချင်းမတူလို့၊ ကိုယ့် အပေါ်မှာ သစ္စာမရှိလို့ စသဖြင့် အကြောင်းအမျိုးမျိုးကြောင့် လမ်းခွဲပြတ်စဲတာတွေ ရှိကြပါတယ်။
အသည်းကွဲဝေဒနာက စကားလုံးနဲ့ မဖော်ပြတတ်လောက်အောင်ကို ခံစားရခက်ပါတယ်။ ခံစားဖူးတဲ့ လူတွေသာ ကိုယ်ချင်းစာပါလိမ့်မယ်။ အဲ့ဒီလို ခံစားနေရတဲ့ နွံထံကနေ ဘယ်လိုရုန်းထွက်ကြမလဲ။
ဒီတစ်ခါမှာတော့ အသည်းကွဲဝေဒနာ လတ်လတ်ဆတ်ဆတ်ခံစားနေရတဲ့သူတွေအတွက် ဘယ်လိုပြန်ကုစားယူမလဲဆိုတာကို ဖော်ပြပေးလိုက်ပါတယ်။
သင်က စိတ်ဓာတ်ကြံ့ခိုင်တဲ့သူဖြစ်ကြောင်း ကိုယ့်ကိုယ်ကို အသိအမှတ်ပြုပါ
Photo Source: www.shelleynoonan.com
သင့်ရည်းစားဟောင်းနဲ့ မတွေ့ခင်တုန်းက သင်ဘဝကို ဘယ်လိုဖြတ်သန်းခဲ့သလဲ ပြန်စဉ်းစားကြည့်ပါ။ သင်က သင်ထင်ထားထက်ကို ပိုပြီး စိတ်ဓာတ်ကြံ့ခိုင်တဲ့သူတစ်ယောက်၊ တန်ဖိုးရှိတဲ့ သူတစ်ယောက်၊ စမတ်ကျတဲ့သူတစ်ယောက်ဆိုတာ မမေ့ပါနဲ့။ အသည်းကွဲဝေဒနာခံစားနေရချိန်မှာတော့ အရာအားလုံးက ပိန်းပိတ်အောင် မှောင်မိုက်နေသလိုခံစားရပါ လိမ့်မယ်။ ဒါပေမဲ့ မနက်ခင်းအလင်းရောင်ဆိုတာ မနက်လင်းတိုင်း ထွက်ပေါ်လာတယ်ဆိုတာ မမေ့ပါနဲ့။
ဖြစ်ပျက်သွားတာတွေ အကုန်လုံးကို လက်ခံလိုက်ပါ
Photo Source: www.psycom.net
ကိုယ်က သူ့အပေါ်မှာ ဒီလောက်ကောင်းရဲ့သားနဲ့ ဘာကြောင့်ထားခဲ့ရက်တာလဲဆိုတဲ့ မေးခွန်းနဲ့ ကိုယ့်ကိုယ်ကို မညှင်းဆဲပါနဲ့။ ငိုချင်သလား၊ အကျယ်ကြီး အော်ငိုပစ်လိုက်ပါ။ ငိုပြီးရင်တော့ ပြီးခဲ့တာတွေ အားလုံးကို အတိတ်မှာပဲ ထားခဲ့လိုက်ပါ။ ကိုယ့်ဆီပြန်လာဖို့လည်း တောင်းပန်မနေပါနဲ့တော့။ သင့်ကို တစ်ခါပစ်သွားခဲ့တဲ့သူက နောက်တစ်ခါလည်း ထပ်ထားသွားဦးမှာပါပဲ။
အလုပ်ရှုပ်ချင် ယောင်ဆောင်ပါ
သင့်ရဲ့ စိတ်၊ ဦးနှောက်နဲ့ ခန္ဓာကိုယ်ကို အလုပ်များများခိုင်းပါ။ သူငယ်ချင်းတွေနဲ့ အပြင်လျှောက်လည်မယ်၊ ဝါသနာအသစ်တွေအတွက် အချိန်ပေးမယ်၊ လေ့ကျင့်ခန်း များများလုပ်မယ်၊ အရင်ကထက် လှအောင်နေမယ် စသဖြင့် ပြုလုပ်ခြင်းက သင့်ဒဏ်ရာအကျက်မြန်စေဖို့အတွက် ကူညီပေးပါတယ်။
ပျော်ပျော်နေတတ်တဲ့သူတွေနဲ့ အချိန်ကုန်ဆုံးပါ
Photo Source: bracketsmackdown.com
ပျော်ပျော်နေတတ်တဲ့ သူငယ်ချင်းတွေနဲ့ ဟာသကားကြည့်မယ်၊ ဟာသစာအုပ်ဖတ်မယ်၊ ဖေ့ဘုတ်ပေါ်က ဟာသဗွီဒီယိုလေးတွေကြည့်ခြင်းဖြင့် များများရယ်မောပေးပါ။
Single ဘဝကို ပျော်ပျော်ကြီး ဖြတ်သန်းလိုက်ပါ
Photo Source: www.eventbrite.ie
တကယ်တော့ Single ဘဝက အားသာချက်တွေ အများကြီးပါပဲ။ သူငယ်ချင်းတွေနဲ့ Night Out ထွက်ရင်လည်း ဖုန်းတဂွမ်ဂွမ်ဆက်ပြီး လိုက်ချုပ်ချယ်မယ့်သူမရှိပါဘူး။ ပျော်ပျော်ပါးပါးနဲ့ မိုင်ကုန်သာကဲပစ်လိုက်ကြရအောင်နော်။
