ကိုယ်ခန္ဓာမှာရှိတဲ့ အဆီတွေအားလုံးထဲမှာမှ ဖယ်ရှားရအခက်ဆုံးက ဝမ်းဗိုက်ကအဆီတွေပဲဖြစ်ပါတယ်။ ဝမ်းဗိုက်ကအဆီတွေ ချေဖျက်ဖို့ဆိုရင် စိတ်ရှည်တတ်ဖို့လိုပါတယ်။ အဆီတွေဖယ်ရှားဖို့အတွက် ဆေးဝါးများမှီဝဲခြင်းက ဘေးထွက်ဆိုးကျိုးရှိနိုင်တာကြောင့် လေ့ကျင့်ခန်းပြုလုပ်ခြင်းကသာအကောင်းဆုံးဖြစ်ပါတယ်။ ဝမ်းဗိုက်ကအဆီတွေကို ဖယ်ရှားပေးမယ့် အထိရောက်ဆုံးလေ့ကျင့်ခန်းများကတော့ –
လေ့ကျင့်ခန်း ၁
မတ်မတ်ရပ်ပြီး ခြေထောက်နှစ်ဖက်ကို ခွဲထားပါ။ လက်နှစ်ဖက်ကို နောက်စေ့နောက်မှာ ထိကပ်ထားပါ။ ဒူးနှစ်ဖက်ကို ကွေးညွှတ်လိုက်ပါ။ ဒါပေမဲ့ တင်ပါးကိုတော့ မလှုပ်ရှားမိအောင် သတိထားပေးရပါမယ်။ ဒူးခေါင်းကွေးလိုက် ခုန်လိုက်၊ ကွေးလိုက် ခုန်လိုက်နဲ့ အကြိမ် ၁၀၀ ခန့် ပြုလုပ်ပေးပါ။ အမောမခံနိုင်သူများအနေနဲ့ကတော့ အကြိမ် ၃၀ တစ်ခါနား၊ အကြိမ် ၂၀ တစ်ခါနားပြီး ပြုလုပ်ပေးပါ။
လေ့ကျင့်ခန်း ၂
ခြေထောက်နှစ်ဖက်ကို ခွာပြီး ရပ်ထားပါ။ ခန္ဓာကိုယ်ကို တစ်ဖက်ကိုကိုင်းချလိုက်တဲ့အခါ ဘယ်လက်က ပေါင်ကိုထိကပ်ထားပြီး အလိုက်သင့်လေးလျှောချပါ။ ညာလက်မြှောက်ပြီး ခေါင်းပေါ်ကနေ ကိုင်းချလိုက်ပါ။ ပြီးရင် အခြားတစ်ဖက်ပြောင်းပြီး ကိုယ်ကိုကိုင်းချပါ။ တစ်ဖက်တစ်ချက်စီ ကိုင်းချပြီးသွားရင် တစ်ကြိမ်ပြည့်ပါမယ်။ ဒီလေ့ကျင့်ခန်းကိုလည်း အကြိမ် ၁၀၀ ခန့်ပြုလုပ်ပေးပါ။ ဒါမှ ရလဒ်ကောင်းကိုရရှိမှာမို့လို့ပါ။
လေ့ကျင့်ခန်း ၃
အရင်ဆုံးကြမ်းပြင်ပေါ်မှာ လှဲချလိုက်ပါ။ လက်နှစ်ဖက်ကို မျက်နှာကြက်ပေါ်ကိုဆန့်တန်းထားပါ၊ ခြေထောက် နှစ်ချောင်းကိုလည်း မျက်နှာကြက်ပေါ်ဆန့်ထားပါ။ ပြီးရင် ခန္ဓာကိုယ်အပေါ်ပိုင်းကို ကြွလိုက်ပြီး လက်ချောင်းလေးများက ခြေချောင်းလေးများကို လှမ်းထိလိုက်ပါ။ ခြေချောင်းလေးများကို ထိလိုက်၊ ခန္ဓာကိုယ်ကို ပြန်ချလိုက်၊ ထိလိုက် ပြန်ချလိုက်နဲ့ အကြိမ် ၅၀ ခန့်ပြုလုပ်ပေးပါ။ ဝမ်းဗိုက်အဆီများ ဖယ်ရှားဖို့အတွက် အသင့်တော်ဆုံးလေ့ကျင့်ခန်းပါပဲ။
လေ့ကျင့်ခန်း ၄
ပုံမှာပြထားတဲ့အတိုင်း ခန္ဓာကိုယ်ကို အသင့်ပြင်ထားပါ။ ဆန့်တန်းထားတဲ့ လက်နှစ်ဖက်အောက်မှာ ပုဝါတစ်ခုစီချထားပါ။ ညာဘက်လက်ကို ဘေးဘက်သို့ တတ်နိုင်သလောက် ဆန့်ထုတ်လိုက်ပါ။ အဲ့လိုဆန့်ထုတ်တဲ့အချိန်မှာ လက်ပဲရွေ့လျားပေးပါ။ ရင်ဘတ်နဲ့ တင်ပါးကို လုံးဝမရွေ့ပါစေနဲ့။ ပြီးရင် ဆန့်ထုတ်ထားတဲ့လက်ကို မူလအနေအထားအတိုင်း ပြန်ထားပါ။ ဘယ်ဘက်လက်ကို ဘေးဘက်သို့ဆန့်ထုတ်၊ ပြီးရင် မူလအနေအထားအတိုင်းပြန်ထားပါ။ အကြိမ် ၁၀၀ ခန့် ပြုလုပ်ပေးပါ။ အဲ့လိုပြုလုပ်ခြင်းအားဖြင့် ဝမ်းဗိုက်ကြွက်သားတွေကို ကျစ်လစ်သွားစေရုံမကဘဲ လက်မောင်းကအဆီပိုတွေကိုလည်း ဖယ်ရှားပေးပါတယ်။
လေ့ကျင့်ခန်း ၅
ကြမ်းပြင်ပေါ်မှာ လှဲချလိုက်ပါ။ ခြေထောက်နှစ်ချောင်းကို ကြမ်းပြင်ကနေ ၅ လက်မ ၆လက်မအကွာမှာ မြှောက်ထားပါ။ လက်နှစ်ဖက်ကို ခေါင်းအောက်မှာချထားပါ။ ပြီးရင် မြှောက်ထားတဲ့ ခြေထောက်ကို ကတ်ကြေးပုံစံ ဟိုဘက်ဒီဘက် ယှက်လိုက်ပါ။ ဒီလေ့ကျင့်ခန်းကိုတော့ ၁၀ ကြိမ်၊ ၁၅ ကြိမ်ခန့်ပြုလုပ်ပေးပါ။
Source: www.howtoxp.com
Featured Image Source: News Case
